Elísabet Benónýsdóttir

2003-12-08T22:21:00.000Z

Var að búa til blogg-síðu fyrir Arnar Bjarka. Þar ætlum við mæðgurnar að skrifa smá fréttir af honum og kannski setja inn eina og eina mynd hér og þar.

2003-07-17T23:04:00.000Z

Hef ekki kíkt á þessa bloggsíðu mjög lengi. Datt í hug að kíkja hér inn í kvöld og laga ruglið sem hefur verið á textanum. Átti eftir að setja "íslensku" stillinguna á eftir að bloggið fór í sparifötin. Annars hef ég haft það afspyrnu gott í sumar. Er í 2,5 eininga sumarkúrs í framhaldsdeildinni í Kennó sem er 2,5 einingum og mikið yfir sumartímann. Var reyndar búin að skrá mig í 5 einingar en féllust svo hendur. Ákvað að eiga eitthvað líf með fjölskyldunni og litla manninum mínum honum Arnari Bjarka sem verður bráðum 5 mánaða. Hann dafnar mjög vel og er síkátur. Við skelltum okkur til Vestmannaeyja á goslokahátíðina og strax helgina eftir í sumarbústað í Brekkuskógi. Síðan höfum við dúllað okkur heima á yndislega sólpallinum og buslað í sundlauginn þar. Við höfum verið svo heppin að fá til okkar fullt af skemmtulegum gestum þannig að hér hefur verið líf og fjör.

Ég og Arndís Erna vorum að koma af alveg frábærum tónleikum hér í Hafnarfirði. Arnar Þór og Guðný Birna fluttu 18 mjög skemmtileg lög sem allir kannast við. Þetta gerðu þau af stakri snilld svo tíminn flaug og allir skemmtu sér vel. Þau ætla að taka að sér að syngja í brúðkaupum og skírnum. Arnar Þór söng við skírnina hans Arnars Bjarka og stóð sig með prýði!!!

Höfum staðið okkur ágætlega að bæta við myndum á fjölskylduvefinn okkar þ.e. myndum af litla krúttinu (er nú ekki viss um að fólk væri eins duglegt að skoða myndir af okkur hinum í fjölskyldunni :-? ) Gaman að heyra hvað ótrúlega margir ættingar og vinir hafa ratað á síðuna.

Bestu kveðjur til ykkar allra

Nóg í kvöld. Góða nótt!!!

2003-06-26T00:38:00.000Z

Vá, það er greinilega langt síðan ég bloggaði síðast. Útlitið hefur breyst til muna í "skrifumhverfinu" . Eins gott að fara að athuga hvort einhverjar róttækar breytingar hafa átt sér stað. Hafði nú ekki hugsað mér að halda áfram að blogga neitt að ráði en það er svo gaman að skrifa smá og leyfa fjölskyldunni að fylgast með hvað er að gerast.

Mikið vatn runnið til sjávar síðan ég skrifaði síðast. Þá var víst verið að skíra "Litla Björn" sem nú heitir Arnar Bjarki. Hann er orðinn 4 mánaða sundgarpur, sprækur og klár. Við erum búin að vera öll heima í sumarfríi. Verið að bralla eitt og annað en lítið farið úr bænum fram að þessu. Skruppum nokkra daga í sumarhús í Hveragerði. Erum á leiðinni til Vestmannaeyja á þriðjudaginn. Ætlum að vera í viku. Helgina 4, 5 og 6. júní er mikið um að vera í Eyjum því þá eru 30 ár liðin frá goslokum. Af því tilefni verður haldin mikil goslokahátíð. Býst við að hitta þar marga af gömlu skólafélögunum sem og aðra vini og ættingja.
Skráði mig í tvo kúrsa í sumar og mætti galvösk í innilotuna (3 dagar samfleytt). Kúrsarnir sem ég skráði mig í voru Fjarnám og kennsla hjá Láru Stefánsdóttur og Hugbúnaður og margmiðlun hjá Stefáni Jökulssyni. Í innilotunni kom í ljós að kúrsinn hjá Láru var farinn af stað með trukki og dýfu og ég misst af byrjuninni. Búið að skila verkefni o.fl. Í stuttu máli sagt þá náði ég mér nú aldrei á strik í þeim kúrsi því ég var að skíra helgina eftir innilotuna og dróst þá enn meira aftur úr þannig að ég tók ákvörðun um að segja mig úr kúrsinum. Ætla bara að vera hjá Stefáni og veita Arnari Bjarka og fjölskyldunni allan þann umfram tíma sem ég hef. Þau eiga það víst skilið eftir alla vinnuþrælkunina undanfarin ár!!! Sá að Kristín Steinars er áfram dugleg að blogga, gaman af því. Ætla að gefa mér tíma og sjá hvort einhverjir fleiri halda áfram. Gaman að fylgjast með hvað fólkið er að bauka!!!

2003-06-25T19:31:00.000Z

Stóðst ekki mátið að skella mér örlitla stund í tölvuna meðan litli snúðurinn sefur. Hef verið að renna yfir bloggið hjá mannskapnum til að verða einhvers vísari um Akureyrarferðina sem ég missti af. Það virðist alltaf vera svipað upp á teningnum með þessa UT-ráðstefnu. Öll áhugaverðu erindin sem mann langar til að sjá eru á sama tíma!! En eru erindin ekki birt á Netinu eða í það minnsta aðalatriðin úr þeim?? Ég þarf að athuga málið, ef einhver veit hvar það er að finna væri vel þegið að fá smá nótu.
Annars snýst lífið þessa dagana um bleyjuskipti og svefn. Við höfum líka reynt að standa okkur í að setja nýjar myndir inn á systkinavefinn fyrir vini og ættingja. Ég hef notast jöfnum höndum við Dreamweaver og Frontpage til að vinna með vefsíðurnar. Varðandi myndvinnsluna þá er ég alveg gift Photoshop ennþá. Er ekki búin að ná sáttum við Fireworks. Ég ætla að láta það hafa sinn tíma. Nú er mig farið að hlakka til að geta farið út að ganga með barnavagninn og fá smá ferskt loft í lungun. Veðrið hefur verið með eindæmum gott og vonandi að það haldist eitthvað áfram.

2003-06-09T10:52:00.000Z

"Litli Björn" var skírður í Garðakirkju í Garðabæ í gær, hvítasunnudag 8. júni. Drengurinn hlaut nafnið Arnar Bjarki og er Björnsson. Arndís stóra systir hélt á bróður sínum undir skírn. Allt gekk mjög vel og skírnarbarnið og Arndís stórar systir stóðu sig vel sem og Arnar Þór sem söng í kirkjunni. Síðan var haldið heim á leið í heljarinnar skírnarveislu. Rétt rúmlega fjörtíu manns heiðruðu okkur með nærveru sinni. Það voru mun fleiri en ég þorði að vona því hvítasunnuhelgin er jú fyrsta mikla ferðahelgi sumarsins. Ég bjóst því við allt að 40-50% afföllum. En nú er veisluhaldinu lokið og við tekur hversdagslegt amstur. Ég verð víst að snúa mér að kúrsunum tveimur sem ég ætla að ljúka í sumar. Ég er svo óheppinn að hafa misst af startinu hjá Láru þannig að ég verð að vinna það tap upp. Eins verð ég að ljúka einu verkefni hjá Stefáni. Nóg að gera í þessari viku.

Kærar þakkir til allra þeirra sem aðstoðuðu okkur og heimsóttu okkur á skírnardaginn.

2003-05-31T23:10:00.000Z

Er frekar montin með mig núna. Ég hringdi látlaust í þjónustuverið hjá Og Vodafone og gafst ekki upp fyrr en nettenginin mín fór að virka. Þegar hún komst loksins í lag tók ég ákvörðun um að breyta skilasíðunni minni og ljúka við hana. Sat sveitt við í kvöld og náði settu markmiði. Vona að skilasíðan mín standist viðmið. Nú get ég farið að snúa mér að bakstri fyrir skírnina og öðru veraldlegu amstri. En strax eftir helgina tekur næsta törn við, innilota í tveimur námskeiðum. Ætli mér sé ekki óhætt að kyssa þetta námskeið bless í bili en ég á örugglega eftir að kíkja hér við annað slagið og á síðu námskeiðsins og heimsækja bloggsvæðin og sjá hverjir verða enn á lífi í bloggheimum!!

2003-05-30T22:42:00.000Z

Nú er skapið ekki með besta móti. Nettengingin mín hefur verið óvirk í þrjá daga og er ekki enn komin í lag. Fékk að fara í tölvuna hjá mömmu til að lesa póstinn og sinna því bráðnauðsynlegasta m.a. að blogga. Ég er búin að liggja í Og Vodafone og hringja allnokkrum sinnum og fá ýmsar ástæður fyrir þessari bilun. Þeir virðast ekki vera alveg sammála um af hvaða toga bilunin er, vegna breytinga sem þeir eru að gera eða eitthvað í þá áttina eða eitthvað allt annað. Þeir eru heldur ekki alveg sammála um hvenær þetta eigi þá að hrökkva í lag af sjálfu sér!!!!! Síðan er það nú ekkert grín að ná í þetta svokallaða þjónustuver þeirra. Kostar nokkrar hringingar og bið í allt að 30 mín. arg, arg, arg. Af þessum sökum kem ég ekki skilasíðunni minni til skila. Langar því að segja í stuttu máli að ég hef lokið verkefnum námskeiðsins. Ég og Anna Magnea ákváðum að slá nokkrum verkefnum saman í einn stóran vef sem kæmi okkur að gagni í kennslunni. Þennan vef köllum við einfaldlega Norðurlandavefinn. Þar er að finna kennslulýsingu, vefleiðangur, leiðbeiningar um bæklingagerð í publisher, fjölda gagnvirkra verkefna auk texta um Norðurlöndin. Ég mun síðan senda skilasíðuna mína út þegar netsambandið kemst í lag hjá mér. Vona að það komi ekki að sök.

Að lokum við ég þakka öllum samveruna á þessu námskeiði. Það hefur verið gaman að fylgjast með blogginu. Vonandi halda einhverjir áfram að blogga.

2003-05-27T10:44:00.000Z

Síðasti vinnufundurinn var haldinn í gær varðandi lokaverkefnið okkar. Við vorum bara duglegar og lukum loks við verkið. Hér er Norðurlandavefurinn okkar. Við segjum staðar numið og skilum af okkur verkefninu eins og það lítur út í dag. Við erum bara vel sáttar við þetta og teljum að vefurinn eigi eftir að styðja vel við kennsluna í það minnsta í okkar skóla. Vonum að aðrir geti nýtt sér þetta líka. Við eigum mjög líklega eftir að bæta við þennan vef í framtíðinni t.d. sýnishornum af bæklingum og eyðublöðum fyrir nemendur og kennara varðandi námsmat.

Nú er bara að ljúka við skilasíðuna og kyssa þennan kúrs bless og fara að huga að þeim næsta.

2003-05-25T23:52:00.000Z

Nú er dagur að kveldi komin enn og aftur. Eurovision afstaðið og þjóðin getur andað léttar. Við stóðum okkur nú alveg ágætlega og þurfum ekki að taka þátt í forkeppni að ári. Maður sat límdur við skjáinn í gær eins og flest allir Íslendingar (þó nokkrir sem ekki vilja viðurkenna það) og gerði því lítið í vefmálum það kvöldið. Ég og Anna Magnea vorum að hugsa um að hittast í dag og fara að ljúka vefnum en hún var fremur þreytt, fannst eins og vörubíll hefði lent á sér, þannig að við blésum það af og erum að hugsa um að herða okkur upp og hittast á morgun mánudag og taka eina góða lotu. Síðan verðum við að fara að snúa okkur að öðrum störfum. Skólaárinu að ljúka, ný námskeið að byrja og ég að undirbúa skírn. Ætla að skíra snúlla litla á hvítasunnudag. Allt kemur þetta með kalda vatninu!!!

2003-05-22T10:08:00.000Z

Nú fer að líða að því að við segjum gagnvirku síðuna góða í bili. Við erum búnar að setja út allflest verkefnin í bili en það er alls ekki útilokað að við bætum við þegar tími gefst til. Nú þurfum við að leggjast í yfirlestur á vefnum. Erum búnar að reyna við nokkra nemendur þ.e. fá þá til að prófa gagnvirku verkefnin, það er gott upp á að koma auga á gallana. Við eigum þá eftir að safna saman krækjum á verkefni sem til eru á Netinu um Norðurlöndin og setja upp á verkefnasíðunni. Þar verður n.k. hugmyndabanki um hvað er hægt að gera í tengslum við kennsluna um Norðurlöndin. Oft þarf verkefni fyrir duglegu nemendurna sem ljúka mjög fljótt og eins fyrir hins sem þurfa kannski aðeins öðruvísi nálganir. Við verðum síðan að fara að gefa þetta verkefni frá okkur í bili og snúa okkur að næstu verkefnum. Ýmislegt sem bíður okkar.

2003-05-20T10:09:00.000Z

Ekki mikið búið að gerast með vefinn okkar yfir helgina. Vorum báðar hlaðnar öðrum skyldum. Áttum að vísu yndislega kvöldstund á föstudagskvöldið þ.e. undirrituð, Anna Magnea, Guðrún Björg kennsluráðgjafi í Garðaskóla í Garðabæ og Steinunn Hall kennsluráðgjafi í Flataskóla. Það tengdist ekkert tölvum heldur förðun. Byrjuðum á snyrtistofu Jónu í Hamraborginni í kennsluförðun í u.þ.b. 4 klst. Þaðan héldum við á Hornið að borða og enduðum á Vínbarnum. Alveg frábært! Óhætt að mæla með henni Jónu. Á sunnudeginum fór ég síðan í heimsókn í Hveragerði og afmælisveislu í Hafnarfirði og því ekkert unnið þann daginn. Í gær mánudag fór ég síðan að eiga við tvö gagnvirk verkefni, laga þau til og ljúka. Við Anna Magnea hittumst síðan í kvöld og tökum lokasprettinn. Ætli við verðum síðan ekki í sambandi með tölvupósti varðandi yfirlestur og lokafrágang. Þá erum við farnar að sjá fyrir endann á þessum áfanga og ekki seinna vænna að fara að huga að skráningu í námskeið vegna haustannar.

Bestu sólarkveðjur úr Hafnarfirðinum

Elísabet

2003-05-17T00:11:00.000Z

Erum frekar stoltar af okkur núna. Sáttum sveittar í allt kvöld að ljúka við útlit á gagnvirku síðunni og að koma út gagnvirku verkefnunum. Við náðum að ljúka við að hanna 3 lógó fyrir blönduðu verkefnin og setja út slatta af gagnvirku verkefnunum m.a. eitt um hvert land og þessi blönduðu. Pörunarverkefnin verða að bíða betri tíma, svo og 6 önnur verkefni m.a. kortaverkefni. Ég verð nú bara að segja að við stöndum okkur skratti vel svona saman. En ég held að við séum búnar að sprengja tímaskalann í þetta verkefni algjörlega óháð því hvort þetta sé nákvæmlega það sem við eigum að vera að gera eða ekki. Höfum sent Salvöru bréf varðandi það mál og bíðum spenntar eftir svari. Við Anna Magnea getur verið létt steiktar þegar við töpum okkur í svona fantasíum. Þá er ekki til veröld fyrir utan prójektið okkar!!!! Nú er bara að finna nokkur góð kvöld í viðbót svo við getum lokið við þetta gæluverkefni. Höfum fengið góð viðbrögð við verkefninu bæði í Hofsstaðaskóla og Flataskóla í Garðabæ. Það er mjög gott að fá góðar ábendingar um allt sem betur má fara. Nú höfum við ákveðið að leggja árar í bát í kvöld, erum farnar að sjá stjörnur enda klukkan langt gengin í eitt og við þurfum að vakna snemma á morgun.

2003-05-14T22:34:00.000Z

Kíkti með litla snúlla upp í Hofsstaðaskóla í dag. Hann fékk mikla athygli hjá konunum og var mjög ánægður með það og brosti hringinn. Stefnir í að hann verði mikill kvennamaður. Við gengum síðan saman þrjár úr Hofsstaðaskóla, allar nýbakaðar mæður með börnin. Örkuðum allan Garðabæ á enda í u.þ.b. 2 klukkutíma og ræddum um allt milli himins og jarðar. Síðan var komið heim, stoppað þar í stuttan tíma og síðan haldið í tækjasalinn í Sjúkraþjálfaranum og hamast í klukkustund eða svo. Næst var brunað í búð og heim. Eftir kvöldmat var síðan sest við tölvuna til að þoka lokaverkefninu áfram.

Nú er krækjusíðan komin á Netið. Það á að vísu eftir að fínpússa hana og tryggja að allar krækjurnar virki. Það þarf að laga í það minnsta tvær, á eftir að skoða þetta örlítið betur. Það er nú meiri tíminn sem fer í svona dútl. Síðan eigum við Anna Magnea eftir að halda svona 1-2 góða vinnufundi til að ljúka verkinu þ.e. að koma gagnvirku verkefnasíðunni fyrir og lesa yfir vefinn og fínpússa. Gott að sjá fyrir endann á þessu í bili. Annars er ég nú ekki sátt við útlitið á krækjusíðunni en það má alltaf vinna í því síðar. Það er jú eftir allt saman innihaldið sem skiptir mestu máli og að þetta sé skýrt og aðgengilegt.

2003-05-12T16:59:00.000Z

Sólarmegin í lífinu

Verkefnið okkar gengur ágætlega. Erum farnar að sjá fyrir endann á því á næstunni vonandi. Eyddi dágóðum tíma í dag í að safna saman krækjum á krækjusíðuna og krækjum á frægt fólk. Tókst að finna frægt fólk í Danmörku, Noregi, Svíþjóð og Finnlandi en verð að játa fávisku mína á frægu fólki á hinum Norðurlöndunum. Man ekki í augnablikinu eftir neinum í Færeyjum, Grænlandi eða Álandseyjum. Hér væru góðar ábendingar vel þegnar. Mér finnst þetta krydda vefinn örlítið og gera hann skemmtilegri fyrir börn og unglinga. Leyfði mér að vera svo bjartsýnni í dag að ég labbaði í bæinn og keypti sólgleraugu á "Litla Björn". Annars er eitthvað verið að spá í að skreppa í sólina næsta haust, svona rétt áður en maður fer að vinna aftur.

"Litli Björn" í sólinni

2003-05-11T17:00:00.000Z

Ótrúleg kosninganótt eða sólarhringur má víst segja. Ég leyfði mér nú ekki að vaka frameftir vegna þess að maður veit aldrei hvenær litla lifandi vekjaraklukkan ákveður að hringja. Annars er hann nú hið besta barn, sefur vanalega til 5:00 og drekkur þá og sefur áfram til 8:30. Ég sá hins vegar lokatölurnar berast af Suðurlandinu þegar ég kveikti á sjónvarpinu í morgun, rétt til þess að upplifa Ingibjörgu Sólrúnu hrynja út af Alþingi eftir mjög stutta "dvöl". Svona er nú lífið! En Lára er víst orðin þingmaður og óska ég henni alls hins besta á nýjum vettvangi. En það var nú ekki dvalið lengi við niðurstöður kosninga því til stóð að lyfta grettistaki í kennsluvefnum um Norðurlöndin í dag. Anna Magnea var mætt á þröskuldinn hjá mér strax um 10:00. Síðan þá höfum við setið sveittar og afrekað ýmislegt. Við erum bara nokkuð sáttar við dagsverkið þó ýmislegt sé eftir. Við eigum eftir að ljúka krækjusíðunni, síðunni með gagnvirku verkefnunum, snurfusa textana um Norðurlöndin og fátt eytt lítið sem ég man ekki eftir í augnablikinu. Við skemmtum okkur konunglega yfir að eyða ómældum tíma í að búa til mynd fyrir gagnvirku síðuna. Vildum ekki hafa þessa geldu töflu enn og aftur með krækjum á verkefnin. Klipptum því fána Norðurlandanna saman og drógum þá að húni á litlum grasbletti, alla í röð. Síðan er hugmyndin að gera hotspot þannig að hægt sé að smella á viðeigandi fána og fá krossaspurningaverkefni. Sniðugt-veit ekki! En okkur þótti þetta voða sniðugt í dag.

2003-05-09T11:07:00.000Z

Nú eru liðnir þrír dagar síðan ég skriftaði síðast. Mikið líður tíminn hratt. Hef haft nóg að gera og því lítið geta sinnt lokaverkefninu okkar. Ég náði mér líka í einhverja smá pest en hún var sem betur fer mjög væg. Verð eiginlega aldrei mikið veik heldur bara drusluleg. Var slöpp eina nótt og þreytt og slöpp daginn eftir en þá var líka allt búið. Ég eyði mikið af "frítímanum" þ.e. svefntíma litla prinsins í að komast í sjúkraþjálfun. Ég verð víst að reyna að koma mér aftur í form eftir brjósklosið. Síðan höfum við verið að fara í nudd með prinsinn einu sinni í viku þ.e. að læra ungbarnanudd og bráðum byrjar hann í ungbarnasundi. Það er sem sagt alveg dekrað við hann. Ég hafði nú hugsað mér að nota tímann í dag til að kíkja eitthvað á verkefnið og hugsanlega hittumst við Anna Magnea um helgina. Síðan er hugmyndin að taka smá skorpu eftir helgina, mánudag og þriðjudag.

2003-05-06T19:52:00.000Z

Ég hef tekið eftir í blogginu hjá "bekkjarfélögunum" að mikið hefur verið rætt um líkamsrækt. Ég er ákaflega stolt af mér þessa dagana því ég hef verið nokkuð dugleg að fara í gönguferðir með vagninn. Hef arkað í 2 tíma í senn, upp og niður brekkur og út um víðan völl. Hef líkast til aldrei farið jafn víða. Búin að ganga í Hafnarfirði, Garðabæ og Reykjavíkurborg (Nauthólsvíkinni og fleiri stöðum). Eitthvað verður maður að gera til að koma sér aftur í form!! En því miður sitja alltaf einhver kíló eftir virðist vera.

Í kvöld á síðan að halda áfram með lokaverkefnið. Anna Magnea kemur hér eftir augnablik og við ætlum að reyna að koma út vefleiðangrinum og hugsanlega að pæla aðeins í hvernig við viljum að síðan með gagnvirku verkefnunum líti út. Við verðum að fara að sjá fyrir endann á verkinu því prófatörnin er að hellast yfir hjá Önnu Magneu og ég þarf hugsanlega að fara að vinna eitthvað smá og undirbúa skírnarveislu. Það er sem sagt nóg að gerast hjá okkur stöllunum þessa dagana.

2003-05-04T22:11:00.000Z

Anna Magnea kom til mín í dag og settumst við niður til að koma efni út á Norðurlandavefinn okkar. Það er ekki ofsögum sagt að stórum hluta af tímanum sé varið í allskyns duttlinga sem tölvan tekur upp á. Einhvern veginn vill þetta allt skríða til stundum og haga sér eitthvað skringilega. En við erum staðráðnar að vinna glímuna að lokum. Við erum þokkalega ánægðar með vefinn en eigum enn eftir að setja svolítið af efni inn á hann og lesa yfir og fínpússa. Það væri fínt að fá ábendingar ef að er eitthvað sem betur má fara. Við ráðum þokkalega við vefsmíðina en treystum okkur nú ekki út í neitt stórræði- kjósum að hafa vaðið fyrir neðan okkur. Það verður spennandi að sjá nemendur í Hofsstaðaskóla nýta sér efnið og vonandi eiga fleiri eftir að gera það einnig.

Eftir að ég skutlaði Önnu Magneu heim var ég með afmæliskaffi fyrir fjölskylduna - Arndís Erna dóttir mín verður 12 ára á morgun, mánudag. Annars er allt á fullu á heimilinu þessa dagana.

Smá bömmer í dag!! Sprakk á bílnum. Það stóð risanagli í dekkinu. Lán í óláni var að dekkið varð loftlaust á planinu heima en ekki einhversstaðar úti í bæ þar sem ég væri ein á bílnum með "Litla Björn" það hefði verið sannkallaður bömmer og flashback því því það gerðist einmitt þegar Arndís var ungabarn.

2003-05-03T14:30:00.000Z

Binni bróðir keypti sér stafræna Canon vídeóvél. Hún er mjög nett og fín. Hann sýndi mér hana þegar hann kom frá London og hélt heillangan fyrirlestur um stafrænar vídeótökur, firewire og hvernig ætti að koma þessu á geisladiska, netið og fleira. Hann var búinn að kynna sér þetta vel rambaði inn á góðar slóðir á Netinu þar sem hægt er að lesa sér til um ýmislegt sem tengist þessu. Best að setja slóðina hér ef ég hef tíma til að skoða þetta. Ég hugsa mér nú gott til glóðarinnar í sumar þegar ég skrepp til Eyja. Þá kíki ég á smá "námskeið" hjá honum! Hér koma þessar skemmtilegu slóðir. Hér er allt um Desktop Videó - góð síða fyrir byrjendur, jafnt sem lengra komna. En hér er hægt að lesa um Moviemaker 2.

2003-05-03T14:16:00.000Z

Var í mikilli glímu í tölvunni í gærkvöldi. Er að gera boðskort og ætlaði að prenta á 10X15 cm ljósmyndapappír. Er með þennan fína HP Photosmart 7150 prentara með sér bakka fyrir blöð af þessari stærð en það gekk samt ekki að prenta út á blöðin. Hún skekkti allt og skildi eftir auð svæði. Samt á að vera hægt að prenta borderless. Meiri vitleysan. Ætli ég neyðist ekki til að lesa bæklinginn. Fyrst að fikta fram í rauðan dauðann og ef ekkert gengur þá er það bæklingurinn. Nema ef það er einhver sérfræðingur þarna úti sem kann ráð og getur e-mailað til mín.

Annars er ég búin að eyða morgninum í að baka 3 kökur fyrir afmælisveisluna og Bjössi flísalagði í kringum mig! Eldhúsið hjá mér er því eins og eftir sprengjuárás. Litli maðurinn sefur alsæll á pallinum í sólinni. Ætli ég þurfi ekki að fara að neyða hann til að vakna. Er búinn að vera úti síðan kl: 9:30 eða 10:00 í morgun. Ég og Anna Magnea ætlum síðan að hittast á morgun og vinna áfram í verkefninu okkar-Norðurlandavefnum. Síðan verður smá afmæliskaffi fyrir fjölskylduna og haldið áfram að flísaleggja og undirbúa stelpufjörið á mánudag.

2003-05-02T20:32:00.000Z

Búið að vera mikið að gera í dag! Er búin að endasendast um borgina í leit að eldhúsviftu og flísum. Okkur vantaði einhver fleiri verkefni (ha, ha, ha) að dunda okkur við fyrst litli snúðurinn er farin að taka upp á því að sofa eins og ungabarn. Hann elskar vagninn sinn og eyðir allt að 8 tímum á dag í honum. Er á meðan er!!!!!

Við Anna Magnea sátum í gær og byrjuðum á því að koma einhverju af því efni sem við erum búnar með inn á vefinn okkar. Við eyddum heilli helgi í að pæla í haus og borðamálum og fórum hamförum í Fireworks. Kunnáttan er nú svona og svona og við vorum ekkert að pæla í hlutum eins og veflitum og fleira. Það fyrirbæri var vel varðveitt aftast í heilaberkinum. Það skapar okkur ýmis vandræði í framhaldinu því borðin er stuttur og við getum ekki notað hreina vefliti til að tóna áframhaldið. En við nennum nú ekki að fá taugaáfall yfir slíku. Annars er möguleiki á að setja borðann í background í sellunni en þá endurtekur hann sig í sífellu. Við verðum bara að sjá til. Alltaf gaman að síðurnar líti vel út en við skulum vona að okkur takist vel upp með innihaldið!!! Við vorum líka mikið að velta fyrir okkur hlutum eins og tilgangi og markmiðum með kennsluvefnum. S.k. lýsingu á verkefninu (á blaðinu frá Þuríði) á þetta að koma fram en okkur fannst ekki við hæfi að það kæmi fram á vefnum sjálfum eða hvað? Ætli við verðum ekki að hafa samband við Salvöru og bera þetta undir hana.

Við Anna Magnea ætlum að reyna að hittast aftur á sunnudaginn þegar hún er búin í innilotunni og sjá hvort við komumst eitthvað áfram. Annars verður nóg að gera þessa helgina því frumburðurinn á afmæli, verður tólf ára og ég ætla að baka og bjóða fjölsk. í kaffi um helgina. Á mánudaginn er síðan búið að skipuleggja keilumót með vinkonum hennar og smá afmælisfjör.

2003-05-01T11:40:00.000Z

Mikið líður vikan hratt! Anna Magnea ætlaði að koma í mat til mín á þriðjudaginn og var hugmyndin að vinna örlítið í verkefninu og spjalla saman. Ég eldaði kjúklingabringur í Hoi Sin sósu og mæli eindregið með að þið prófið þann rétt. Það er mjög auðvelt og fljótlegt að elda þetta. Bara að krydda bringurnar með kjúklingakryddi eða öðru sem fólk kýs. Steikja þær stutta stund á pönnu eða grilla (sem er enn betra) setja þær í eldfast mót og hella sósunni yfir. Láta þær vera í ofninum í c.a. 20 mín eða þangað til þær eru tilbúnar. Gott er að hafa með þessu kínverska grænmetisblöndu (fæst frosið í flestum betri búðum) og eggnúðlur.

Anna Magnea komst því miður ekki í veisluna og ætlum við því að hittast í dag fimmtudaginn 1. maí. Næsta skref er að fara að búa til undirsíðurnar í vefnum, og fara að setja inn efni. Ég held að okkur miði ágætlega, en þetta tekur allt voðalega langan tíma. Það tekur bara hálftíma til klukkutíma að setjast niður og koma sér að verki. En best að hafa í huga hina fleygu setningu: Kemst þó hægt fari!!!.

2003-04-29T11:49:00.000Z

Ég eyddi stórum hluta gærdagsins í að koma vefnum okkur Önnu Magneu á fót. Við vorum búnar að hanna haus og borða og þurftum síðan að koma þessu einhvern veginn fyrir. Vorum í fyrstu að hugsa um að vera með tvískipta rammasíðu en féllum síðan frá því og ákváðum að nota frekar template. Það gekk ekki þrautalaust að finna út úr þessu en gekk á endanum. Ég vona að framhaldið gangi vel. Nú er bara að hella sér út í að vefa og vona að maður muni eitthvað af því sem búið var að finna út. Við fengum góða aðstoð hjá Guðrúnu Björgu og ábendingar og kom það sér mjög vel að geta leitað til hennar. Verkinu miðar ágætlega.

2003-04-27T18:36:00.000Z

Nú er aldeilis búið að innbyrða af sætindum og klóra sér í skallanum. Ég sótti Önnu Magneu í dag og við héldum áfram að vinna við kennsluvefinn okkar. Við settumst aftur niður og ræddum hugmyndir en helltum okkur svo út í að hanna hliðarborða (sidebar) og haus fyrir vefinn. Kunnáttan í Fireworks er nú ekki upp á marga fiska en ýmislegt býr nú í manni frá Photshop. Síðasta innlögnin hjá Birni gerði líka gæfumunin og kom manni betur af stað. Við erum komnar vel af stað með efnið, búnar að skrifa almennan texta um Norðurlöndin, smá fræðslutexta um hvert landanna, gera vefleiðangur og kennslulýsinginn er langt komin. Við ætlum okkur síðan að safna saman kræjum og verkefnum sem við finnum á Netinu og hugsanlega gera einhver vefrallý. Þetta helgast allt af tímanum sem við höfum til verksins.

Ég sat í gær og stúderaði enn betur Hotpotatoes og hlóð niður viðbætum. Sýnist nú lítið hafa gerst í þróun á því forriti frá því við notuðum það síðast í Íslandsverkefninu. Ætla síðan að skoða svolítið pörunarverkefni með myndum í Hotpotatoes. Næsta stig er síðan að koma vefnum á laggirnar og byrja að vefa.

2003-04-25T11:59:00.000Z

Hugleiðingar í tengslum við pistil Kristínar Steinars þann 16.04. 2003

Ég kenndi hjá Framtíðarbörnum til skamms tíma ásamt Kristínu, Eyþóri og Gunnari. Verð þó að játa að ég man nú ekki eftir honum Gunnari. Er ekki viss um að leiðir okkar hafi legið saman. Ég kenndi um tíma hér í Hafnarfirði en síðan niður á Grensásvegi. Var meðal annars að kenna á sumarnámskeiðnum. Ég er sammála vangaveltum Kristínar um nauðsyn þess að kenna nemendum svolítið á forritin sem þau eiga að vinna með í námi sínu. Ég er samt sem áður líka fylgjandi skapandi vinnu en til þess að hún geti átt sér stað verður maður að kunna eitthvað eða hafa í það minnsta einhverja hugmynd um hvað hægt er að gera. Kennsla á forrit er í mörgum tilvikum ekki ítarleg heldur kynnig ætluð til að vekja áhuga, kveikja í viðkomandi áhuga á frekara námi. Við verðum þó að gæta þess að fara ekki út í allt of mikla mötun. Ég ræddi það t.d. við nokkra kennara hjá Framtíðarbörnum á sínum tíma að mötunin væri of mikil þar, allt var unnið í templatum og í lok námskeiðs þá gátu krakkarnir í sumum tilvikum ekki opnað forritið sjálfir og byrjað að gera eitthvað nema að fá skipun um það frá kennara og leiðbeiningu.

Í Hofsstaðaskóla leggjum við bæði áherslu á að kynna forrit fyrir nemendum og kenna þeim örlítið á þau og að nota tölvurnar í tengslum við námið. Við erum t.d. með 2 mismunandi tíma á viku fyrir nemendur í 3-6. bekk. Í öðrum tímanum eru þau að nota kennsluforrit eða vinna eitthvað í tengslum við námið. Hugsanlega að afla upplýsinga á Netinu, nota gagnvirk verkefni á Skólavefnum, stærðfr. og tölvulæsisvefnum eða hvað sem er. Í hinum tímanum eru þau að læra ákveðna hluti t.d. lærir 3. bekkur undirstöðuatriði í ritvinnslu og lærir að nota ýmis forrit til sögugerðar. Í 4. bekk er lögð áhersla á Netið þ.e. að þau læri á vafrara, að flakka um Netið og kynnist ýmsum hugtökum, í 5. bekk er farið í ritvinnslu og tölvupóst og í 6. bekk er farið í vefsíðugerð. Þetta er í mjög grófum dráttum það sem við gerum í tölvukennslunni. Skólinn á svo að auki fartölvuvagn sem kennarar nota í kennslustofum, þá gjarnan í tengslum við einhver verkefni.

2003-04-25T11:43:00.000Z

Gleðilegt sumar!

Ég og Anna Magnea sátum við í gær í stað þess að fara í skrúðgöngu með börnin eins og almennilegir foreldrar. Við tókum þó smá göngu með "litla-Björn" svona rétt til að viðra okkur. Við erum búin að ákveða að skíra á hvítasunnudag þannig að þá get ég hætt að nefna drenginn "litla-Björn" eins gott því það gæti fests við hann. Verkið okkar gengur hægt en gengur þó. Við höfum unnið þetta bæði sitt í hvoru lagi og saman. Við hittumst í gær til að búa til vefleiðangurinn og ræða um uppbyggingu á vefnum. Eins og þetta lítur út núna þá verðum við með almennan texta um Norðurlöndin, texta um hvert land, vefleiðangur sem snýst um að nemendur eiga að fjalla um eitt af Norðurlöndunum og gera bækling í Publisher, gagnvirk verkefni, önnur verkefni og krækjur á ýmis verkefni. Við erum að auki að hugsa um að hafa kennarasíðu sem hefur að geyma eyðublöð og hugsanlega einhverjar kennslulýsingar. Ekki alveg fullmótað ennþá. Við stefnum á að vera duglegar að vinna í dag föstudag í sitthvoru lagi en hittast svo á morgun, laugardag og byrja á vefpælingum.

2003-04-23T22:28:00.000Z

Það er búið að vera líf og fjör á bænum frá því fyrir páska. Jói bróðir kom með fjölskylduna sína áður en hann fór í sumarbústað. Binni bróðir og Þórey komu líka því þau voru á leið til London. Síðan var Sigurrós systir hans Bjössa í bænum yfir páskana ásamt sinni fjölskyldu og Adda vinkona mín og hennar fjölskylda voru líka á fastalandinu og kíktu við. Eyjamenn sannarlega á faraldsfæti. Þannig að þetta er búið að vera óvenjumikið fjör hjá okkur í bili.

Binni bróðir og Þórey Björg, Sumarliði og Hjörleifur Ingibjörg og Arndís Erna.

Nú verður maður hins vegar að fara að bretta upp ermarnar. Hvernig er þetta með öll þessi fögru fyrirheit?? Alltaf skal þetta klikka. Við Anna Magnea ætluðum að vera ógeðslega duglegar yfir páskana og vinna vel í verkefninu okkar. Ég var hins vegar ekki dugleg í neinu nema að borða og mér skilst á Önnu Magneu að svipað hafi verið upp á teningnum hjá henni!!! Endalaus veisluhöld út í eitt. Ekki bætti það úr skák að bæði ég og Bjössi áttum líka afmæli núna um og eftir páska. Enn frekari afsökun til að borða meira.

Ég var voða dugleg fyrst og var að ljúka við að "skrifa" um öll Norðurlöndin en var þá svo óheppin að disklingurinn með öllum textunum skemmdist. Öll vinnan tapaðist á einu bretti. Ekki hjálpaði það mikið að hugsa um öll ef -in þ.e. hvað ef ég hefði nú bara gert eins og vanalega vistað á harðadiskinn og tekið afrit. Aldrei þessu vant átti ég þetta bara á þessum eina disklingi. En það þýðir víst ekki að gráta það. Ég er komin langleiðina með að vinna verkið í annað sinn!!! Þessir disklingar eru algert drasl, held ég fái mér nú bara þennan fína USB penna við tækifæri til að vista gögn.

2003-04-20T15:03:00.000Z

Hef verið að skrifa texta fyrir kennsluvefinn okkar Önnu Magneu. Gengur fremur hægt. Verkefnið er ekki mjög skemmtilegt þar sem um ákveðna endurvinnslu er að ræða. Það er víst ekki hægt að breyta staðreyndum um Norðurlöndin mikið. Reyni þó að taka það besta og áhugaverðasta um hvert land úr bókum og af Netinu. Hlakkar hins vegar mikið til að geta kíkt á Hot Potatoes betur, skoðað nýjungar og fara að pæla í öðrum hlutum en heimildavinnu.

2003-04-16T11:29:00.000Z

Hún á afmæli í dag, Hún á afmæli í dag Hún á afmæli hún Elísabet hún á afmæli í dag. Nú er ég orðin árinu eldri. Ætla mér ekki að halda upp á afmælisdaginn í þetta sinn enda frekar ómerkilegur þannig séð 32 ára. Ég náði loksins að ljúka við að koma út partýmyndunum. Var reyndar að vandræðast með hvar ég ætti að setja krækju á þær. Var að reyna að troða þeim inn á persónulega vefinn minn. Komst þá að því að ég er bara alls ekki nógu ánægð með þann vef en verð að láta hann duga. Þarf að nota kraftana í kennsluvefinn núna.

Verð að útrétta heilmikið í dag, fara til læknis (kvensjúkdómalæknis- þokkaleg afmælisgjöf það!!) og í sjúkraþjálfun og ljúka innkaupum fyrir páskana. Síðan geri ég ráð fyrir að setjast við tölvuna í kvöld og semja texta fyrir kennsluvefinn vegna kennsluvefsins. Þetta verður nú lítið frumsamið heldur eins og heimildaritgerð. Ég leita fanga í kennslubókum, á Netinu og í bókum. Textarnir eiga aðeins að fjalla um það helsta sem tengist Norðurlöndunum og styðja við námsbókina. Anna Magnea ætlar að vinna í kennslulýsingunni vegna þess að hún hefur ofnæmi fyrir heimildavinnu. Síðan hellum við okkur í verkefnin þ.e. vefrallý, vefleiðangur og gagnvirk verkefni. Þetta er planið en við sjáum hvað setur. Við höfum í það minnsta stefnt á að vera komin með mest af efninu um eða fljótlega eftir páska og fara þá að vinna tæknivinnuna þ.e. vefa og fleira.

2003-04-15T11:47:00.000Z

Við mættum galvaskar upp í Hofsstaðaskóla í morgun og hófum vinnu við kennsluvefinn okkar. Vorum hins vegar á smá bömmer til að byrja með því ég lagðist á Netið í gær og fann ýmislegt um viðfangsefnið m.a. kennsluvef. sem nemendur í KHÍ hafa unnið. Hann er hins vegar ekki eins og við höfðum hugsað okkur og byggir á allt annarri kennsluhugmynd. Einnig er engin trygging fyrir því að áðurgreindur vefur verði til staðar þegar nemendurnir yfirgefa Kennaraháskóla Íslands.Við veltum fyrir okkur að breyta um viðfangsefni en ákváðum að halda okkur við Norðurlandavefinn því við viljum búa til námsumhverfi fyrir okkar nemendur og hafa fullt vald yfir vefnum og geta breytt honum að vild eftir því sem hentar hverju sinni. Ef einhverjir aðrir kjósa síðan að nýta sér það þá er það vel. Við höfum ekki hugsað okkur kennsluvefinn okkar sem fjarkennsluefni heldur stuðning við nemendur og kennara og n.k. þekkingarvef.

Í morgun byrjuðum við á kennsluefninu þ.e. að skrifa texta um Norðurlöndin og tókum síðan hvert Norðurlandanna fyrir sig. Við leitum fanga á Netinu, í kennslubókum í kennsluforritinu Ísland og umheimurinn og í Alfræðiorðabókinni.

2003-04-15T00:00:00.000Z

Við Anna Magnea hittumst í dag og byrjuðum á lokaverkefninu. Við eyddum mestum tíma í að leggja línurnar og ætlum að halda áfram á morgun. Ég hef verið að "skanna" Netið og sjá hvað er til og komst að því að það er ýmislegt og misjafnt að gæðum. Okkur Önnu Magneu langar hins vegar að gera kennsluvef sem styður vel við kennslubókina um Norðurlöndin og hentar okkar skóla og kennsluaðferð. Við ætlum að leggja áherslu á samvinnunám og fjölbreytt verkefni. Við stefnum á að vera með gagnvirk verkefni, vefrallý, vefleiðangur, bæklingagerð í publisher og ýmis önnur verkefni. Hugmyndin er líka að hafa smá umfjöllun um Norðulöndin almennt og svo smá texta um hvert land.
.
Þetta er búið að vera ansi annasamur dagur. Arkaði niður í bæ síðdegis, kom við á bókasafninu og í skóbúð en gat nú engu eitt þar. Verð að vera áfram á sömu túttunum í bili. Síðan kom bróðir minn og hans fjölskylda frá Eyjum nú í kvöld. Þau eru alls 5 og ætla að vera hérna hjá okkur fram á miðvikudag. Það verður fjör á bæ á morgun!

Fjölskyldan hans Jóa bróður

Á myndunum má sjá Jóa bróður eða Jóhann Benónýsson, konuna hans Lilju Sæbjörnsdóttur ásamt börnunum þeirra þremur tvíburasystrunum Anítu og Andreu og Sæbirni Sævari. Hann "Litli Björn" minn fékk að sjálfsögðu að vera með á tveimur myndum.

2003-04-13T18:44:00.000Z

Gekk um Hafnarfjörð þveran og endilangan í dag ásamt Birni mínum og "litla Birni". Arndís er fyrir norðan n.t.t. á Akureyri að keppa í . Ég handbolta og kemur ekki fyrir en seint í kvöld.. Fórum út á hádegi og komum heim um sexleytið. Við vorum nú ekki svo góð að vera á gangi allan þennan tíma heldur stoppuðum við aðeins hjá tengdamömmu minni og örkuðu síðan niður í bæ og settumst á Kaffi Aroma og höfðum það huggulegt. Þetta var bara eins og að vera í útlöndum. Eftir kaffihúsasetuna var aftur arkað heim og þá notaði ég tækifærið á meðan litli snáðinn sefur út í vagni að fara í tölvuna. Ég þarf að blogga, setja inn myndirnar úr partýinu hjá Kristínu og lesa póstinn minn.

2003-04-13T18:29:00.000Z

Bros dagsins

.

Litli snúður farinn að brosa allan hringinn.

Jæja nú er innilotunni lokið og þá er bara að bretta upp ermarnar og byrja á verkefnunum. Finnst ég vera full af orku eftir helgina en við sjáum til. Við Anna Magnea höfum hugsað okkur að verja góðum tíma af páskaleyfinu í viðfangsefnið.

2003-04-12T15:37:00.000Z

Hér er slóð á síðu hjá Salvöru sem fjallar um stílsnið Áhugavert að kíkja þarna við tækifæri.

2003-04-12T14:07:00.000Z

Er í innilotu í Kennó í dag!!!

Ég elskaði

Ég elskaði lífið ljósið og ylinn;

nú liggur það grafið í djúpan hylinn

Og vonir mínar, sem voru fleygar

Sumar dánar en sumar feigar.

úr ljóðum Jóhanns Gunnars Sigurðssonar.

2003-04-10T19:24:00.000Z

Er búin að vera á ferðinni í allan dag. Byrjaði á því að fara með "litla Björn" í í ungbarnaeftirlitið -6 vikna skoðun. Hann er nú orðinn 60 cm á lengd og 5,7 kg. Hann dafnar mjög vel og er orðinn eins og súmóglímukappi!!. Eftir skoðunina var haldið í bæinn í útréttingar og síðan í kennslu í ungbarnanuddi. Ég ætla að nudda "litla Björn" tvisvar á dag. Hann er voðalegur nautnaseggur og finnst mjög gott að láta stjana við sig. Eftir þetta var haldið heim á leið. Veit ekki hvort ég eða "litli Björn" var þreyttari. Hann verður alltaf svo þreyttur eftir nuddið. Ég held að ég fari síðan yfir skipulagið með manninum fyrir morgundaginn, nuddi litla karlinn og hvíli mig svo fyrir komandi átök. Mikið að gera um helgina; innilota í Kennó, hugsanlega partý og fertugsafmæli hjá starfsfélaga.

2003-04-10T19:13:00.000Z

Nú er komið að næstu innilotu. Orðið ansi langt síðan ég sá andlitin á fólkinu síðast því ég komst ekki með á Akureyri. Er búin að vera á smá "bömmer" síðustu tvo daga því ég taldi mig vera í voða góðum málum og búin með öll verkefni sem ættu að vera búin fyrir þessa innilotu- En nei, ég hef greinilega eitthvað misskilið þetta. Á að vera búin með vefleiðangur og kennsluvef! Var á þeim buxunum í fyrradag og í gær að hætta bara og leggjast undir feld. Ég ákvað að kveikja bara ekkert á tölvunni í gær og í dag. En svo kom gamlan þrjóskan upp og ég ákvað að reyna frekar að bretta upp ermarnar um páskana og gera eitthvað í málunum. Er nú ekki vön að vera tossinn í bekknum en einhvern tíma er allt fyrst!!!! Hef ýmsar hugmyndir varðandi vefleiðangur og kennsluvef en þarf fyrst að kanna örlítið hvað er til á markaðnum og hvað vantar. Gott væri að tengja þessi tvö verkefni saman þ.e. að vefleiðangurinn nýtist á kennsluvefnum.

2003-04-07T21:45:00.000Z

Eins og áður hefur komið fram í þessu bloggi mínu þá hefur frjósemin verið góð á þessu heimili. Kötturinn okkar, Snotra eignaðist tvo kettlinga fyrir c.a. tveimur vikum síðan. Hún er sífellt á ferð með þá um húsið í leit að góðum stað. Við bjuggum um hana í þvottahúsinu en hún er ekki ánægð með það því hún verður hrædd þegar þvottavélin fer af stað. Hún er því berandi kettlingana fram og til baka um húsið. Kettlingarnir dafna vel og eru aðeins farnir að opna augun (bara pínkulítið). Læt hér fylgja með nokkrar myndir af Snotru með "börnin" sín.

2003-04-07T21:32:00.000Z

Nú er komið í ljós að ég er í seinni hópnum í innilotunni sem sagt föstudag og laugardag. Er búin að finna mér glærur til að taka með. Vona að ég sé ekki að misskilja þetta eitthvað. Mér finnst eins og ég sé ekki búin að ljúka öllum þeim verkefnum sem á að vera lokið. Þarf eitthvað að kanna þetta betur. Ég er búin að gera vefrallý, verkefnið hjá Láru og Sólveigu og komin með persónulegan vef þar sem m.a. er skilasíða með öllum verkefnunum og tæknisögunni. Síðan hef ég reynt að blogga samviskusamlega í dagbókina mína hérna á Netinu.

Mér var bent á þessa skemmtilegu síðu fyrir vefara. Hér er hægt að finna ýmislegt skemmtilegt til að krydda vefsíðugerðina.

2003-04-05T23:50:00.000Z

Búið að vera nóg að gera í dag. Fór á fimleikamót upp í Árbæ. Litlu tvíburafrænkur mínar úr Vestmanneyjum voru að keppa í Fylkisheimilinu. Tók snúlla litla með mér. Síðan skrapp ég í bæinn og var ekki komin heim fyrr en um 15:00. Þá var farið í að græja matinn því von var á fólki í mat. Kvöldið var síðan notað í að slappa af fyrir framan imban, nudda og baða litla sveininn í nýju baðfötunni sem ég fjárfesti í í dag og koma honum síðan í vöggu. Inn á milli skaust ég síðan í að brenna um 36 geisladiska fyrir skólann minn. Kíkti þangað á föstudaginn og gat náttúrulega ekki yfirgefið svæðið nema með smá aukaverkefni í farteskinu. Þarf síðan að skreppa þangað aftur á mánudag og erindast smá.

Er búin að óska eftir að vera í seinni hópnum í innilotunni þ.e. föstudag og laugardag. Var að lesa yfir verkefnalistinn og fékk nett í magann. Er ekki alveg viss hvort ég sé búin með það sem á að vera búin með. Er ég eitthvað að misskilja þetta eða??? Þarf að athuga betur á morgun eða eftir helgina. Hef ekki heyrt í Láru aftur eftir að ég sendi henni slóðina að verkefninu eftir að ég lauk því. Gott að einhverjir eiga líf fyrir utan NKN 03!!!! Ætli ég kíki ekki í dagbókina hennar og forvitnist aðeins um hvar hún er stödd á landinu. Sjálfsagt er allt á fullu í kosningaslagnum. Nú verða fréttir af tveimur stríðum á öllum stöðvum stríðið í Írak og kosningastríðið. Vei, vei þá hef ég nógan tíma til að vera í tölvunni því ekki nenni ég að horfa á sömu fréttirnar endurteknar hundrað sinnum. Hef heldur ekki fundið "tíkina" í mér ennþá þ.e.a.s. pólitíkina. Er oft bara sammála síðasta ræðumanni.

Best að hætta þessu í bili og skella sér í bólið og reyna að ná einhverjum nokkrum klukkutímum með snúlla litla.

2003-04-03T09:59:00.000Z

Það hefur verið eitthvað vesen á blogginu annað slagið. Þegar ég blogga þá birtist það ekki fyrr en daginn eftir. En þetta kemur á endanum og það er jú það sem skiptir máli!!

Nú er það komið á hreint með innilotuna. Okkur er skipt í hópa og annar hópurinn mætir fimmtudag og föstudag en hinn föstudag og laugardag. Best að fara í að útvega sér pössun og gera ráðstafanir. Verð líka að muna eftir glærukynningunni. Ætla að athuga hvort ég á ekki kynningu sem ég get notað.

2003-04-02T14:19:00.000Z

Hjálp!! Þetta er nú meira bullið. Mér varð á að feitletra eina setningu og gleyma að loka taginu í endann. Síðan þegar ég ætlaði að laga þetta þá er það ekki hægt. Ég hef í það minnsta ekki fundið út úr því ennþá. Ég þarf að kíkja betur á þetta við tækifæri. Allar ábendingar vel þegnar.

2003-04-01T17:24:00.000Z

Er búin að kíkja inn á vefborðið og tjá mig lítillega um rannsóknina hjá Sólveigu. Annars voru fáir búnir að tjá sig eitthvað þannig að það var lítið að tjá sig um nema segja frá sinni eigin reynslu.

Skrifaði Salvöru í dag út af innilotunni. Er ekki með alveg á hreinu hvernig dagskráin er. Þarf að skipuleggja mig vel, útvega pössun og fleira.

2003-03-31T17:15:00.000Z

Það er greinilega frjósemi hjá þessari fjölskyldu. Ekki nóg með að Snúlli litli fæddist þann 23.02.03 þá hefur fjölgað á heimilinu síðan. Kötturinn okkar Snotra eignaðist tvo kettlinga síðastliðinn föstudag þ.e. þann 28.03.03. Það varð mikil gleði og spenningur hjá dóttur minni. Hún kom heim úr skólanum og ég sagði henni að ég héldi að það væri komið að þessu því kötturinn var búin að vera "óþolandi" allan daginn. Elti mig um allt og reyndi að troða sér inn í þvottavél, skáp eða allt sem ég opnaði. Arndís mín var svo almennileg að búa um köttinn í neðstu hillunni í fataskápnum sínum og leyfa henni að gjóta þar!! Sú varð glöð. Inn í skápinn hún fór og kettlingarnir litu dagsins ljós!!!
Sem sagt ef ykkur vantar kettling þá er hann til á þessu heimili!!!

2003-03-31T17:06:00.000Z

Gott að fá bréfið frá Salvöru í dag varðandi innilotuna þ.e. þetta verkefni með Powerpoint. Mér sýnist við ekki eiga að hafa neitt mjög mikið fyrir þessu. Bara finna glærur eða búa til stutta kynningu. Ég ætti að ráða við það. Búin að halda nokkrar kynningar og þarf að skoða hvort boðlegt er að nota einhverja af þeim.

Skrapp í göngu í dag með vagninn sem er ekki í frásögu færandi nema fyrir það á þessum klukkutíma var ekt íslenskt sýnishornaveður. Lagði af stað í björtu og lygnu veðri. Fljótlega tók að hvessa, síðan lyngdi aftur en þá fór að rigna. Að lokum fór að rigna ennþá meira og hvessa. Ég komst við illan leik heim með vagninn úr þessari svo til fyrstu löngu svaðilför. Var fljót að skella heitu kakói á helluna til að fá smá líf í kroppinn aftur.

2003-03-31T09:09:00.000Z

Nú er enn einni helginni lokið. Tíminn flýgur. Veðrið um helgina var hins vegar alls ekkert vorlegt. Ég hef lítið sem ekkert farið út með litla snúllan en hlakka óneitanlega til þegar fer að vora meira og sumra. Hann dafnar hins vegar nokkuð vel en er með þetta vélindabakflæði og að ég held ungbarnakveisu eða einhverja óáran því hann stynur óskaplega og engist sundur og saman. Hann hefur ekki verið mjög duglegur að sofa á nóttunni en það lagast vonandi. Ég er sannfærð um að maður verður búin að gleyma þessu eftir nokkur ár. Maður man bara eftir sólinni en gleymir óveðursdögunum. Kannist þið ekki við að hafa heyrt hjá eldra fólkinu: "Ég þurfti aldrei að vakna til barnanna minna. Þau bara sváfu"

Lauk verkefninu hjá henni Sólveigu á föstudagskvöldið eins og áður kom fram. Á eftir að kíkja á Webboard og tjá mig um málið. Kemst kannski í það í dag. Ég er líka á lokasprettinum með verkefnið hjá henni Láru. Átti eftir að ljúka ensku síðunni og laga þetta til. Það hefur hins vegar ekki gengið þrautalaust því ég er alveg helv... léleg í Dreamweaver. Hefði svo sannarlega þurft að geta kíkt í bókina, farið á námskeið eða kíkt í Kennó og hitt einhverja spekinga. Er hins vegar ekkert að stressa mig yfir þessu því ég bjarga mér með ýmsum ráðum nota Frontpage, nota photoshop og bara það sem hentar hverju sinni.

Læt fylgja með eina mynd af snúlla litla. Hann er orðinn 5 vikna gamall.

2003-03-28T23:54:00.000Z

Nú er klukkan að nálgast 24:00 og ég er búin að ljúka við verkefnið hennar Sólveigar að ég held. Les kannski einu sinni enn yfir lýsinguna til að sannfærast um að því sé algjörlega lokið. Er búin að senda inn gögnin og senda bréf til hennar með framkvæmdarlýsingunni. Þetta gekk nú bara vel. Fannst þetta virka eitthvað flókið og mikið í fyrstu en þegar ég var búin með fyrstu athugunina og að skrá hana þá var þetta nokkuð viðráðanlegt. Ætli sé ekki best að reyna að fara að sofa eitthvað því maður veit aldrei hvenær vaktinn byrjar !!!

Nú þarf ég að ljúka við verkefnin hjá Láru. Átti eftir að búa til ensku síðuna og laga til myndirnar og bilin. Vona að það takist allt núna um helgina. Síðan er að kynna sér hvað sé næst á döfinni.

2003-03-27T10:23:00.000Z

Ég byrjaði aðeins á að vinna gögnunum í sambandi við rannsóknina. Ég byrjaði að vélrita lýsinguna inn. Fannst þetta svolítið erfitt þar sem tveir nemendur voru að vinna saman og þá sérstaklega út af því að ekki má nafngreina þá. Reyni að grípa í þetta annað slagið og býst við að ná að senda þetta inn um eða eftir helgi. Ég hlakka svolítið til að fylgjast með dóttur minni hérna heima. Það verður allt öðruvísi því það verður ekki neitt skipulagt verkefni og aðstæður allt aðrar en í skólanum.

Annars er það nú hálffyndið hvað maður er utan við sig þessa dagana. Dóttir mín sagði við mig í hneykslunartón: "Mamma þú átt eftir að kveikja í húsinu einhvern tíma". Málið er nefnilega að ég er alltaf að reyna að gera fullt af hlutum í einu en er í raun eins og hellisbúinn og ræð bara við að gera eitt í einu, í það minnsta núna. Málið er að ég setti pizzu í ofninn og ætlað aldeilis að vera almennileg við stelpuna þegar hún kæmi heim úr skólanum og fór síðan aðeins, pínku smá í tölvuna og á meðan brann pizzan til kaldra kola í ofninum. Eins um daginn var ég að sjóða vatn og ætlaði smá að ryksuga á meðan. Gleymdi náttúrulega alveg að ég hafði sett vatnið yfir og og allt í einu fann ég einhverja undarlega lykt. Fór inn í eldhús kíkti í pottinn og úps! Allt vatnið horfið fyrir löngu síðan. Stelpan mín sagði með réttu að ég ætti nú bara að einbeita mér að einu í einu og klára það. En svona er það þegar tíminn og stuttur og það er margt sem liggur fyrir. En ætla nú í smá endurhæfingu og byrja á færri hlutum og ljúka. Sjá svo til hvort þessi kvenlegi hæfileiki kemur ekki til baka - að gera allt í einu og meika það!!!

2003-03-26T10:28:00.000Z

Mætti niður í Hofsstaðaskóla uppúr 8:00 í morgun til að fylgjast með tveimur nemendum í sambandi við rannsóknina hjá Sólveigu. Það gekk bara vel. Ég á eftir að fara eina ferð niður eftir og fylgjast með 1-2 í viðbót. Annars get ég nú fylgst með stelpunni minni hérna heima og hugsanlega einhverri vinkonu en ætla að sjá til. Þarf í það minnsta að útvega mér einn dreng til viðbótar. Sagði í gríni við stelpuna mína að bjóða tveimur strákum með sér heim í tölvuna en ég veit nú ekki hvert hún ætlaði!!! Síðan býst ég við að vinna endanlega úr þessu á föstudagskvöld og um helgina.

Hitti marga vinnufélaga að sjálfsögðu. Þá rak í rogastans héldu að ég væri komin til starfa aftur úr barneignarfríi. Ég hélt nú ekki. Lenti á spjalli við tvær og rakti þeim raunir mínar varðandi brjósklosið í hálsliðunum. Þá kom í ljós að þær báður höfðu átt við ýmis einkenni að stríða frá hálsi, öxlum og í höndum. Við fórum að ræða tölvunotkunina og vinnuaðstöðuna. Önnur talaði um að henni finnst hún hafa versnað mikið eftir að hún fór að nota fartölvuna á kennaraborðinu. Ég held að það væri mjög áhugaverð stúdía að skoða vinnuaðstöðu í sambandi við tölvuvæðinguna og skoða hvort margir hafi hlotið einhvern "skaða". Er hugsanlega verra að nota fartölvurnar í svona vinnu. Er stoðkerfinu meiri hætta búin? Eða er þetta algjörlega okkar mál þ.e. erum við kannski of kærulaus að huga sjálf að vinnustellingum, standa reglulega upp og hreyfa okkur reglulega og vera í formi. Áhugaverð pæling. Ég veit að í mínu tilfelli er þetta samverkandi. Er með ömurlega vinnuaðstöðu í vinnunni, of hátt borð og lélegan stól. Skjárinn á fartölvunni allt of lítill fyrir svona mikla tölvuvinnu og svo mætti lengi telja. En ég sjálf sit líka oft eins og rækja og er ekki nóg dugleg að fara vel með mig.

Verð að láta flakka með að ég ætla á sýninguna í kvöld í Smáranum þ.e. með dávaldinum. Fór hérna fyrir mörgum árum í Eyjum þegar Frisinett (Innskot: Veit ekkert hvernig nafnið er skrifað og læt þetta flakka svona) kom og þá var rosalega gaman. Veit að þetta er umdeild skemmtun en gat bara ekki sleppt þessu tækifæri. Það er líka voða gott að komast aðeins út.

Jæja læt þetta nægja í bili því að mörgu er að hyggja (eða huga???).

2003-03-25T15:09:00.000Z

Fékk tölvupóst frá Láru með umsögn um verkefnið. Mjög gott að fá endurgjöf svona fljótlega og ég tala nú ekki um þegar hún er svona skemmtileg og með smá persónulegum nótum. Lára greinilega skorpukona þegar hún tekur sig til. Hún hefur greinilega náð sér ágætlega af flensunni.
Það er svo gaman að vera í smá tengslum við aðra sem eru á námskeiðinu sérstaklega þegar maður hefur ekki tök á að mæta í laugardagstímana. Maður situr því einn með tölvunni öllum stundum og puðrar út verkefnum og hugrenningum með jöfnu millibili.

Er búin að kíkja vel yfir gögnin frá Sólveigu vegna rannsóknarinnar. Ég býst við að geta unnið eitthvað í þessu verkefni í vikunni. Kíkti á fyrirlestur Sólveigar um eigindleg og megindleg gögn og kóðun. Mjög gott að vera búin að skoða hann vel því hann er góður undirbúningur undir rannsóknina. Er búin að prenta út eyðublöðin og lesa vel yfir kóðunarlistann. Þá er bara að útvega sér "fórnarlömb" og hefjast handa. Ætli það dæmist ekki á mömmu að hafa auga með litla krílinu meðan ég fer niður í skóla og horfi á krakkana. Ég get líka fylgst með dóttur minni, henni Arndísi sem er 11 að verða 12 ára. Sé til hvernig gengur að "sleppa út".

2003-03-23T12:16:00.000Z

Fín grein um bloggið í Mogganum í dag. Nú ætlar víst Háskóli Íslands að fara að nota bloggið í kennslu. Kalla það nútímabókmenntir. Ég get nú ekki annað en farið smá hjá mér þegar ég les þessar greinar um bloggið. Fólk er að blogga af mismunandi ástæðum. Sumir eru að bulla um hversdagslífið en aðrir að skrifa um stjórnmál, tónlist eða skoðanir sínar á öllu og engu. Mér finnst ég hafa ósköp lítið fram að færa þessa dagana. Ætli ég teljist ekki til þeirra sem blogg að mestu um sig og sína eitthvað bull. Mér finnst einhvern veginn öðruvísi að blogga núna þegar ég hef lítinn tíma til að liggja yfir bloggi annarra og skoða hvað er að gerast. Finnst ég vera svolítið ein í tómri tunnu. Hver dagur er ekki það viðburðaríkur að ég finni hjá mér ómótstæðilega þörf á að skrásetja hann á blöð sögunnar. Ég ætti kannski að skrá hver bleyjuskipti, allar framfarir hjá litla snúllanum og þar fram eftir götunum. Það gæti kannski haft upplýsingagildi síðar t.d. ef maður bætir enn einu barninu í safnið :-)

Best að hætta þessu bulli í bili og nýta tímann til að kíkja á þetta rannsóknarverkefni hjá Sólveigu. Það verður smá snúið fyrir mig að útvega mér viðföng þar sem maður er meira og minna bundin heima með litla skinnið en þetta hefst allt á endanum.

2003-03-21T08:44:00.000Z

Efst á baugi núna er stríðið í Írak. Aðrar fréttir falla alveg í skuggann. Úr mínum litla heimi er lítið að frétta. Endalaus hringrás bleyjuskipta og "matmálstíma" síðastliðnar 4 vikur. Litli snáðinn braggast mjög vel og er farinn að sofa örlítið betur. Bráðum getum við farið út að viðra okkur saman þ.e.a.s. ef veðrið fer að skána ögn. Aftur slagveður í dag, rok og rigning.

Nú er ég loksins að skríða saman eftir erfiðar fjórar vikur. Strax eftir að ég átti litla snáðann og kom heim fékk ég þessar rosalegu kvalir í öxlina og handlegginn. Ég hélt að öxlin á mér væri ónýt eða einhverjar taugar hefðu klemmst. Lifði á bólgueyðandi og verkjastillandi, fór í nudd og heitu pottana og gat ekki notað hendina neitt. Fór til læknis hann sagði mér að það væri fínt að fara í sund og nudd og reyna að láta sér batna. Heimilislæknirinn minn sagði að ég mætti alls ekki fara í nudd, það þyrfti að láta þetta algjörlega í friði. Bara fara til sjúkraþjálfara og sjá svo til. Reyndi nú samt að fara í tölvuna annað slagið og blogga og ljúka verkefnum. Ég fór síðan til bæklunarlæknis í vikunni og greindi hann mig með brjósklos í 5 eða 6 hálsliðnum. Það getur víst leitt svona út í öxlina og hendina. Hann taldi að það tæki svona 4-6 vikur að jafna sig vel af þessu. Hann staðfesti það sem heimilislæknirinn minn sagði að það mætti alls ekki nudda í þessu eða neitt. Bara láta þetta eiga sig. Hugsanlega láta sjúkraþjálfara toga örlítið í þetta en annað ekki. Ég fer til sjúkraþjálfara 2 í viku í togmeðferð og hlakka mikið til að ná mér þokkalega góðri aftur. Þetta minnir mann á mikilvægi þess að hafa góða vinnuaðstöðu. Ég held að þessi krankleiki minn sé af miklum hluta vegna slakrar vinnuaðstöðu og rangrar líkamsbeitingar við m.a. tölvuna. Ég held að við gerum aldrei nóg af því að minna nemendur okkar á að beita sér rétt. Í skólum er oft ekki lögð mikil áhersla á vinnuaðstöðu nemenda t.d. með því að hafa stóla sem hægt er að stilla. Við fáum bara einn líkama. Eitt er víst að ég legg meiri áherslu á vinnuaðstöðuna fyrir sjálfa mig þegar ég fer aftur að vinna eftir orlofið. Var dugleg að minna nemendur og aðra á slíkt en fór ekki eftir því sjálf.

Reyni því að vera frekar stutt í tölvunni í hvert skipti núna og hreyfa mig vel á milli á meðan ég er í afturbata. Þessu vildi maður oft gleyma í vinnunni þ.e. að standa upp reglulega og hreyfa sig. Oft liðu klukkustundinar áður en maður leit upp frá skjánum.

2003-03-19T11:54:00.000Z

Vaknaði í grenjandi rigningu í morgun. Mikið fannst mér nú notalegt að heyra regnið dynja á þakinu. Heltist yfir mig smá sumarbústaðatilfinning. Við höfum nefnilega verið svo heppinn að fá óvenjuoft rigningu þegar við skellum okkur í bústað.

Skaust í að bæta inn nýjum myndum á systkinavefinn. Fjölskyldan gefur ekkert eftir í að rukka.
Litli snáðinn þyngist vel var vigtaður af hjúkrunarfræðingi í gær og er hann orðinn 4750 gr. Ég get farið að viðra mig og hann um eða eftir næstu helgi. Hann hefur verið frekar óvær annað slagið oft þá sérstaklega á nóttunni. Hann er með vélindabakflæði eftir því sem barnalæknirinn segir og þarf ég að skella í hann hvítu glundri 1/2 tíma eftir hverja máltíð. Veit nú ekki hvort það gerir eitthvað fyrir hann en vona að hann fari nú að hrista þetta af sér.

Ég ætla nú að fara að kíkja yfir síðuna mína sem ég gerði "fyrir Láru" og byrja á að snara henni á engilsaxneskuna. Læt síðan Önnu Magneu kíkja yfir þegar hún kemur frá USA. Ég þarf líka að fara að skoða betur rannsóknina hjá Sólveigu. En nú er bara að taka einn dag í einu og reyna að nýta góðu stundirnar.

2003-03-17T22:01:00.000Z

Dagurinn í dag hefur verið nokkuð góður. Litli snáðinn hefur náð að sofa ágætlega og ég náði loksins að skjótast í verkefni 2 hjá Láru þ.e. að skrifa um mig sem fagmann á sviði UT og kennslu. Ég á hins vegar eftir að ljúka við ensku síðuna. Vona að það takist mjög fljótlega. Reyni að nýta hverja stund sem gefst. Annars var Anna Magnea búin að bjóðast til að aðstoða mig við ensku þýðinguna og er ég þakklát fyrir það því hún er tvítyngd. Stundum hefur maður vit á því að þiggja alla þá hjálp sem gefst.

2003-03-15T19:10:00.000Z

Ég sit við tölvuna með litla prinsinn mér við hlið í vöggunni og vagga honum með fætinum á meðan ég hamra á hnappaborðið. Hann sefur vært í augnablikinu við niðinn frá viftunni í tölvukassanum. Aldrei of seint að fara að venja hann við tölvurnar. Var að ljúka við að koma umfjölluninni um seinni greinina af tveimur sem ég átti að fjalla um í stað UT ráðstefnunnar. Ég þarf hins vegar örlítið meiri tíma til að koma frá mér verkefni tvö hjá Láru þ.e. vefsíðunum. Mamma bjargvættur ætlar að koma frá Eyjum á mánudag. Kannski að hún geti litið eftir litla skinninu á meðan ég lími trýnið á mér við tölvuskjáinn enn á ný!!! Mig langar að koma þessum umfjöllunum á skilasíðuna mína ásamt fleiri verkefnum en við sjáum hvað setur. Hef bara í huga það sem Sólveig sagði: "Kemst þótt hægt fari" og vona að Lára sjái aumur á mér í þetta skiptið.

2003-03-15T19:04:00.000Z

Hér kemur loksins stuttur pistill minn um greinina hennar Láru.
Þarfagreining og áætlanagerð í upplýsingatækni

Í grein sinni Þarfagreining og áætlanagerð í upplýsingatækni fjallar Lára um mikilvægi þess að gera áætlanir og vanda vel til verksins þegar byggja á upp upplýsingatækni í skólastarfi. Að mörgu er að huga.
Meginþættirnir eru: kennslufræði, vélbúnaður, hugbúnaður, símenntun, nám og kennsla og önnur störf.
Fram kemur að við áætlanagerðina sé rétt að hafa í huga þarfir stofnunarinnar en huga að fjárhagslegu umfangi síðar. Með öðrum orðum má segja að áætlanirnar eigi að miðast við “draumastöðuna” en síðar þarf að forgangsraða og vinna skv. skýrum markmiðum eftir því fjármagni sem fæst. Lára tekur fram í greininni að menn þurfi að hætta að hugsa eins og fátæklingar. Þetta er nokkuð sem flestir sem starfa í menntageiranum kannast við.
Aðrir þættir sem Lára kemur inn á í greininni eru aðferðirnar við áætlanagerðina þ.e. hvernig á að skoða og meta aðstæður, Hvernig á að safna upplýsingum, Hvernig á að setja upplýsingarnar fram, Hvað verður gert við upplýsingarnar, skýrslugerð, kennslufræði, tækjabúnaður, hugbúnaður, símenntun og stoðþjónusta.

Mér fannst grein Láru mjög góð og greinlegt er að Lára hefur mikla reynslu af þarfagreiningum og áætlanagerð í upplýsingatækni í skólum. Skólar eru um margt mjög margþættir og sérstakir vinnustaðir. Huga þarf bæði að þörfum starfsfólks og nemenda og nú í dag einnig foreldrum og samfélaginu í kringum skólann. Skólinn þarf að standa undir og vinna í takt við þær kröfur sem samfélagið gerir til hans.

Ég hef fengið að taka þátt í að móta stefnu og gera áætlanir í sambandi við uppbyggingu á upplýsingatækni í grunnskólum Garðabæjar. Í desember 1999 var skipaður starfshópur til að móta tillögur að framtíðarskipan tölvumála m.t.t. nýrrar aðalnámskrár. Í starfshópnum áttu sæti þrír kennarar, einn frá hverjum grunnskólanna, einn fulltrúi skólanefndar. Einnig störfuðu með hópnum forstöðumaður fræðslu- og menningarsviðs og grunnskólafulltrúi. Hópurinn hélt 8 fundi, gerði tvær kannanir, annars vegar á tölvueign heimilanna og notkun nemenda á þeim og hins vegar könnun á tölvunotkun kennara. Tilgangurinn var að varpa ljósi á stöðuna og auðvelda þannig tillögugerð.
Segja má að þegar ég lít yfir það vinnuferli sem nefndin starfaði eftir þá svipar því mjög til þess ferlis sem Lára lýsir í grein sinni. Nefndin lagði fram ítarlega skýrslu með tillögum. Síðan þá hefur verið unnið eftir þeim tillögum og á hverju skólaári tekin fyrir ákveðin verkefni. Á ákveðnum tímapunktum hefur verið framkvæmt mat. Oft gleymist slíkt þ.e. að staldra við og spyrja sig: Erum við á réttri leið? Hvað hefur áunnist? Hvert viljum við stefna?

Ekki þarf að tíunda hversu mikla kosti það hefur í för með sér að gera góðar áætlanir. Gallarnir eru hins vegar þeir að oftar en ekki er lítill tími gefinn til slíkrar vinnu. Eins er mjög mikilvægt að sem flestir sem starfa við viðkomandi stofnun komi að áætlanagerðinni. Allir þurfa að vera vel upplýstir og samstíga í því hvert skuli stefna. Ég tel ómetanlegt að skólastjórnendur séu vel upplýstir og sýni áhuga því eftir höfðinu dansa limirnir.

Ég gæti haldið lengi áfram að fjalla um þarfagreiningu og áætlanagerð í upplýsingatækni en hef ákveðið að láta hér staðar numið. Ég hvet hins vegar alla þá sem eru að huga að uppbyggingu í UT að lesa grein Láru.

Bestu kveðjur

Elísabet

2003-03-13T16:03:00.000Z

Verkefni 1 hjá Láru Stefánsdóttur

Ég hef farið síðastliðin ár á UT ráðstefnuna og haft bæði gagn og gaman af. Ég hélt mig þó heima að þessu sinni og var með “löglega” afsökun því litli kúturinn minn er bara tveggja vikna og heimurinn snýst algjörlega um hann þessa dagana og ekkert annað. Nú er lífið kapphlaup, nýta hverja mínútu sem litli kútur sefur til að ljúka nauðsynlegum verkefnum.

Ég valdi mér tvær greinar af þeim sem Lára benti okkur á á vefnum sínum. Annars vegar er það greinin: Development courses for teacher in the Akureyri Junior College og hins vegar þarfagreining og áætlanagerð í upplýsingatækni.
Báðar eru greinarnar eru mjög áhugaverðar og í takt við það sem ég hef upplifað undanfarin ár í mínum skóla varðandi upplýsingatækni þ.e. Hofsstaðaskóla í Garðabæ. Þótt skólastigin séu mismunandi virðast viðfangsefnin vera þau sömu eða í það minnsta mjög áþekk.

Development courses for teacher in the Akureyri Junior College

Í greininni fjallar Lára um nauðsyn þess að veita kennurum endurmenntun í upplýsingatækni. Hún telur ákjósanlegustu leiðina vera þá að halda námskeið fyrir kennara á þeirra vinnustað í þeim aðstæðum sem þeir starfa við á hverjum degi. Ennfremur telur hún mikilvægt að kennararnir skilgreini sjálfir hvað þeir kunna og hvað þeir kunna ekki og þá hvað þeir telji sig þurfa að læra. Hún lagði spurningarlista fyrir kennarana sína í Menntaskólanum á Akureyri til að komast að hvaða námskeið þyrfti að halda. Menntaskólinn á Akureyri hafði einnig samvinnu við Fjölbrautarskólann í Ármúla um námskeiðahald. Sameiginleg námskeið voru kennd á fjarnámskeiðum. Alls voru haldin um 15 mismunandi námskeið. Námskeiðin sem voru haldin voru bæði námskeið þar sem kennt var á tiltekin forrit og svo kennslufræðileg námskeið sem fjölluðu um hvernig flétta mætti upplýsingatækni inn í námið.

Ég er mjög sammála því sem fram kemur í grein Láru um námskeiðahald fyrir kennara í upplýsingatækni Ég held að það sé mjög mikilvægt að kennararnir sjálfir skilgreini hvað þeir telji sig þurfa að læra og hvað þeir hafi áhuga á. Ef áhugahvötin er ekki til staðar er hætt við að námskeiðið verði eingöngu afplánun fremur en uppspretta nýrrar þekkingar og möguleika. Eins er mikilvægt að þeir geti strax nýtt sér það sem þeir eru að læra. Ég held að það þurfi í mörgum tilfellum að “ýta” kennurum af stað og hreinlega neyða þá til að mæta í tölvuver eða panta fartölvuvagn og nota tölvur með nemendum. Ég held að kennararnir sjálfir læri ekki síður en nemendur ef þeir þurfa að undirbúa sig fyrir kennslu og kenna nemendum í tölvuveri. Nauðsynlegt er að veita kennurum stuðning.

Við höfum farið þessa leið í Garðabæ þ.e. að halda námskeið fyrir kennara á vinnustað. Í upphafi var gerð þarfagreining í samvinnu við Manfred Lemke hjá Símenntunarstofnun Kennaraháskóla Íslands. Í þarfagreiningunni var gerð könnun á því hvað kennarar töldu sig kunna og hvers konar námskeiðum þeir óskuðu eftir. Kennsluráðgjafar skólanna fór síðan yfir niðurstöðurnar með Manfred og skipulögðu námskeiðahald í framhaldi af því. Símenntunarstofnun kennaraháskólans sá um kennsluna á þessum námskeiðum. Síðan þá hefur þarfagreiningin verið lögð fyrir tvisvar sinnum bæði til að meta árangurinn og til að skipuleggja næstu lotu í námskeiðahaldinu. Samið var við Tölvu- og verkfræðiþjónustuna um áframhaldandi námskeiðahald í grunnskólum bæjarins.

Mér finnst þetta hafa tekist nokkuð vel þó enn sé nokkuð í langt. Þróunin í tölvuheiminum er mjög hröð og sífellt nýir hlutir til að nema. Það sem ég held að sé mjög mikilvægt í þessu ferli er að einhver haldi utan um námskeiðahaldið þ.e. hafi umsjón með þarfagreiningum, skipuleggi námskeið, geri auglýsingar, hvetji kennara til að mæta og minni þá á, veiti þeim stuðning á vinnustað og sé til staðar til að svara spurningum.
Vandamálið eða gallar við námskeiðahaldið hefur einna helst verið að finna því tíma. Kennarar vilja helst ekki mæta á þessi námskeið utan dagvinnutíma þ.e. á kvöldin eða um helgar. Slík kennsla er einnig mun dýrari. Kennarar eru yfirhlaðnir störfum og mæta á námskeiðin í lok vinnudags t.d. frá 15:00-18:00 og eru þá oft á tíðum mjög þreyttir. Einnig hefur mikilvæg þekking “glatast” þegar fólk hættir störfum og nýir koma í staðinn sem jafnvel eru á byrjunarreit. Þá þarf að hefja ferlið aftur frá grunni. Þetta er nýr þáttur fyrir skólastjóra að huga að við ráðningar þ.e. að halda þekkingarstiginu innan skólans þannig að hægt sé að sækja fram. En því miður fara ekki alltaf hagsmunir og markmið “upplýsingatæknideildarinnar” og annarra saman!!

Ég tel mjög mikilvægt að leggja megináherslu á endurmenntun kennara fremur en endalausa tækjavæðingu. Auðvitað þurfa aðstæður að vera góðar þ.e. góðar tölvur að vinna á, hugbúnaður og þjónusta þarf að vera til staðar við tölvukerfin því fátt er eins letjandi og tölvur og hugbúnaður sem virkar ekki þegar mætt er í tölvuver með bekk. Einnig tel ég mikilvægt að kennarar geti leitað aðstoðar eða stuðnings hjá fagstjóra/ kennsluráðgjafa varðandi tölvunotkun.
Það er hins vegar ærið verkefni að fá kennara til að gera ráð fyrir upplýsingatækni í kennsluáætlunum, breyta kennsluaðferðum og “þora” t.d. að sleppa ákv. blaðsíðum í bókinni eða sleppa henni alveg. Margir kennarar líta á tölvurnar og tölvunotkun sem gulrót. Einnig er það nokkuð áberandi hjá kennurum að ef verið er að nota tölvur þá er þetta tölvutími fremur en kennslustund í t.d. íslensku þar sem tölvurnar eru verkfærið í stað blað og blýants. Ég held að mjög margir séu enn fastir í þeim fasa að mæta í tölvustofuna með bekkinn sinn, velja eitthvað forrit af handahófi eða leik og eiga síðan huggulegan tíma . Þetta þarf að breytast!!

Með bestu kveðjum

Elísabet

2003-03-13T15:57:00.000Z

Ég valdi mér tvær greinar af vefnum hjá Láru til að fjalla um í stað UT- ráðstefnunnar á Akureyri. Þetta eru greinarnar: Development courses for teachers in The Akureyri Junior College og Þarfagreining og áætlanagerð í upplýsingatækni.

Ég er búin að lesa þær og hef verið að skjótast í að skrifa niður mínar hugleiðingar í tengslum við greinarnar. Ég ætla að reyna að henda þessu hérna inn í bloggið hjá mér um helgina. Annars læt ég bara flakka hér á eftir þær hugleiðingar sem ég hripaði niður í tengslum við greinina Development courses for teachers in The Akureyri Junior College . Ég les það svo bara yfir við tækifæri og lagfæri.

Ég las einnig greinina sem birtist í Morgunblaðinu í dag um reynslu nemanda af fartölvuvæðingunni í MA sem flutt var á UT-ráðstefnunni. Þar kemur ýmislegt áhugavert fram sem studdi nokkuð við mína sýn þ.e. að fartölvurnar í sjálfu sér hafa enga gjörbyltingu í för með sér ef kennarar eru ekki í stakk búnir að breyta kennsluháttum. Ég held að það komi til með að taka nokkurn tíma að endurmennta kennara og breyta kennsluháttum. Við verðum að vera þolinmóð og velja vel þær leiðir sem við kjósum að fara. En nánar um þessi mál síðar!!

2003-03-10T14:43:00.000Z

Notaði tækifærið til að skjótast í tölvuna meðan litli kútur tók sér smá blund. Kíkti yfir bréfið frá Láru varðandi verkefnin framundan. Fór á vefsíðuna hjá henni og prentaði út "verkefnalistann". Eins kíkti ég aðeins á síðuna hjá henni Sólveigu til að kanna hvað væri framundan þar. Nú er eins gott að fara að skipuleggja sig vel. Það er merkilegt hvað einfaldir hlutir geta tekið langan tíma í þessu tölvubrasi.

2003-03-06T16:49:00.000Z

Best að reyna að standa sig í að blogga nokkrum sinnum í viku. Ég hef nú ekki miklu að státa af varðandi námið. Minn heimur hefur að mestu snúist um litla erfðarprinsinn frá því hann fæddist þann 23. febrúar. Litli snúðurinn dafnar vel. Hann hefur þurft að sætta sig við að vera vigtaður á steikarafati á heimilisvoginni undanfarna daga.

Hann er komin yfir fæðingarþyngd og virðist vera að komast yfir magakrampann. Það tekur hins vegar tíma að ná upp einhverri daglegri rútinu. Nú tekur maður bara einn dag í einu. Ég hef alveg látið eiga sig að takast á við einhver stærri verkefni og hugsa að ég láti það bíða örlítið lengur. Hef hins vegar verið að hugsa um hvernig ég geti greitt "skuld" mína varðandi Akureyrarferðina en ekkert dottið í hug ennþá. Kíkti á verkefnin hjá Önnu Magneu, hún er nú búin að setja upp vefrallýið sem við gerðum og ýmislegt fleira. Greinilega að standa sig. Mjög glæsilegt hjá henni.

2003-02-28T17:10:00.000Z

Loksins, loksins leit lítill prins dagsins ljós. Hann kaus að koma á sjálfan konudaginn n.t.t. sunnudaginn 23. febrúar. Allt gekk mjög vel. Við vorum komin í Hreiðrið hjá MFS kl: 20:30 um kvöldið og hann var fæddur kl: 23:22. Heimurinn hefur síðan snúist um þennan litla svein síðan. Hann dafnar vel og er náttúrulega fallegasta barn í heimi :-)
Ég býst nú við að næsta vikan eða jafnvel vikurnar fari í að kynnast þessum nýja einstaklingi og ná einhverri rútínu. Samhliða reyni ég að gera hvað ég get varðandi námið. Annars verður maður bara að taka góða skorpu þegar tækifæri gefst.

Við Arndís settum upp vef fyrir ættingja í Vestmanneyjum og aðra sem áhuga hafa á að fylgjast með hvernig gengur. Þennan vef köllum við systkinavefinn . Þar eru komnar nokkrar myndir. Læt hér fylgja með 2 myndir af nýjustu afurðinni með systir sinni Arndísi Ernu 11 ára

2003-02-21T12:57:00.000Z

Vaknaði í morgun í dúndurstuði. Mér fannst alveg frábært að kíkja út og sjá "jólasnjóinn". Sem betur fer fór ég snemma á fætur því um klukkan 9:00 var snjórinn á undanhaldi fyrir þessari líka leiðinlegu rigningu og roki í þokkabót. Það var ekki slæmt að geta sest niður með bók í hönd í stað þess að þurfa að rjúka út.

Enn eitt hænuskrefið á verkefnasviðinu stigið í dag. Er loksins búin að koma tæknisögunni á netið. Var í raun löngu búin að vefa hana en átti eftir lokafrágang og senda hana frá mér.

Kíkti á heimasíðu námskeiðsins og sé enn að ég ásamt fleirum erum X merkt. Ekki laust við að manni sé farið að líða eins og gyðingi (smá grín :-) annars á maður ekki að gantast með svona hluti. Er bara í nokkuð góðu formi í gær eftir alltof langa - og dýra verslunarferð í Smárann í gær. Sogaðist alveg óvart inn á bókamarkað sem var nýopnaður og áður en ég vissi af rötuðu allmargar bækur í innkaupakörfuna. Mitt viðhorf hefur samt sem áður verið að heimsækja bókasöfnin. Hef ekki neina þörf fyrir að safna hillufóðri. Vill helst eiga uppflettirit og slíkt en ekki skáldsögur. Orðabækur og slíkt finnst mér líka voða gott að eiga í tölvunni. Keypti þó allt í bland í gær.

2003-02-20T14:17:00.000Z

Ég er nú meiri erkiaulinn. Var búin að skrifa hér merkispistill sem síðan bara gufaði upp. Nákvæmlega eins og Salvör var að tala um í einu af bréfunum. Ég get hins vegar engum kennt um nema sjálfri mér. Smellti óvart á Posts efst í vi. horni í stað post eða post and publish og allt hvarf med det samme!!!! Nú er ég alveg dottin úr stuði og nenni ekki að endurskrifa pistilinn frá upphafi. Enda á hann það vart skilið því hann var ekki merkilegur!!

Erfinginn er ekkert á þeim buxunum að líta þennan heim þrátt fyrir batnandi veður. Margir eru nú farnir að stríða manni á því að þessi bráðláta kona sé nú ekki að flýta sér með þetta. En ég held því nú fram að nú komi mitt rétta eðli í ljós. Ég er eftir allt saman svona róleg í tíðinni. Ekki eru nú allir á því að kaupa þá útgáfu :-)
Ég var búin að vera ósköp duglega að vinna mér í haginn þ.e. var búin að koma mér vel af stað í blogginu, búin að gera persónulegan vef, vefrallý og skrifa tæknisöguna. Eyddi líka smá tíma í að gera lítinn vef með dóttur minni sem langaði að "læra" eitthvað í vefsíðugerð. En nú er ég hrædd um að þetta sé allt horfið út um gluggann fyrst erfinginn lætur bíða svona eftir sér. Ég er 2-3 vikum á eftir áætlun miðað við mitt plan. Dóttur mín kom í heiminn rétt rúmri viku fyrir áætlun en þetta barn ætlar að koma 2 vikum eftir áætlun.
En ég verð bara að vona að það verði þá rólegt í tíðinni þannig að ég nái að spýta í lófana þegar næsta verkefnasúpa ríður yfir.

Annars er þetta svo vel skipulagt hjá Salvöru og við fáum gott yfirlit yfir það sem liggur fyrir framundan þannig að þetta ætti allt að hafast.

Hef verið að setja tæknisöguna upp í Dreamweaver og þyrfti að drífa í að ljúka því og koma því á vefinn minn.

Ég skrifa hér næst þegar verða einhver stórtíðindi.

Bestu kveðjur til Kristínar, Báru og Berglindar. Það var gaman að heyra í ykkur. Gott að heyra að Bára slapp við skakkaföll í veðrinu á Seyðisfirði. Óska Berglindi góðrar ferðar út. Það verður gaman að heyra allt um ferðina og Smartboard þegar hún kemur til baka.

Góða helgi
Elísabet

2003-02-12T11:27:00.000Z

Í morgun birtist auglýsing í Mogganum um UT ráðstefnuna á Akureyri þannig að það styttist í hana. Hlakka til að fylgjast með því (úr fjarlægð þó). Ég horfði líka á viðtal við lektor úr Háskólanum (Ágúst) um fartölvuvæðingu. Hef alltaf gaman að fylgjast með umfjölluninni um fartölvuvæðinguna. Mest er fjallað um fartölvuvæðingu framhaldsskólanna þ.e. þá aðallega kaup nemenda á fartölvum. Flestir eru að vakna upp við það ekki nægir að fjárfesta í tækjunum, margt annað þarf að koma til ef upplýsingatæknin á að skila okkur "betri" menntun! Nú er sjónum beint að kennurum og námsefnisgerð og hæfni þeirra og þekkingu til nota Ut til gagns. Margir góðir punktar komu fram í þessu viðtali. Áhugavert að sjá hvað framtíðin ber í skauti sér varðandi þessi mál!!

Var aðeins í gær að fikta við að setja upp tæknisöguna mína þ.e. á vefinn. Gekk nú ekki alveg eins og í sögu, gengur hægt en gengur þó!

2003-02-11T09:24:00.000Z

Merkisdagur í dag! Í dag átti erfinginn að koma í heiminn en hann ætlar greinilega að láta bíða eitthvað eftir sér. Vona að það sé ávísun á að barnið sé bara svona rólegt :-) Ég skrapp á bókasafnið í gær og hneykslaði mömmu upp úr skónum því ég fór ekki í ástarsöguhilluna og tók einhverjar hentugar sængurlegubækur að hennar mati. Rak augun í Dreamweaver 4 kennslubók og ákvað að skella mér á hana, þrátt fyrir mótmæli. Vonandi tekst mér að glugga örlítið í hana við tækifæri. Er að hugsa um að drífa í að setja tæknisöguna á vefinn minn. Ég hef nú ekki setið neitt að ráði við tölvuna síðastliðna daga. Hef reynt að hvíla mig og safna orku. Það kemur að því að ég taki aðra skorpu, mér finnst ágætt að vinna þannig.

2003-02-07T13:59:00.000Z

Enn einn föstudagurinn. Mikið líður vikan hratt. Mér finnst ég vera á ágætu róli með námið held ég. Er búin að koma mér upp vef og skilasíðu. Er búin að setja vefrallýið út á Netið. Anna Magnea lét nemendur sína í 6. bekk prófa það í morgun og mér skilst að það hafi gengið vel. Krökkunum fannst það skemmtilegt og þeir vildu ekki hætta þegar tíminn var búinn.

Anna Día kom í morgun og við vorum að fara aðeins yfir tengimál við vefsvæðið úr Dreamweaver. Mér finnst ég vera búin að ná góðum tökum á því og það er í raun ákaflega auðvelt. Ég þarf hins vegar að skoða betur layout málin, töflugerð o.fl. í forritinu áður en ég geri eitthvað meira. Veit ekki hvort nýja efnið um Dreamweaver MX er tilbúið hjá henni Salvöru, þarf að athuga það. Vel þegið ef einhver hefur upplýsingar um það mál. Væri alveg til í að fara niður í Kennó á morgun en það verður að bíða betri tíma. Treysti á Önnu Magneu. Hún fer og veitir mér upplýsingar. Verð að treysta á sjálfsnámið í bili.

Bestu kveðjur til allra og góða helgi!!!

2003-02-06T16:15:00.000Z

Ég er búin að sitja svolítið við tölvuna í dag. Undarlegt hvað tíminn flýgur hratt í þessum tölvuheimi. Þetta styttir manni stundirnar við biðina eftir erfingjanum. Ágætt að tilkynna það hér að það er ekkert að gerast í þeim málum. Ætti kannski að benda vinum og vandamönnum á dagbókina til að minnka álagið á símkerfinu :-) .

Var að dunda aðeins við vefrallýið og reyna að eiga við Dreamweaver. Er enn ekki búin að gefa mér tíma til að fara í gegnum tutorial en "hakka" því meira í forritinu sjálfu. Væri til í að fjárfesta í Dreamweaver MX bók. Ef einhver veit um góða slíka má hinn sami gjarnan skrifa í skjóðuna mína eða senda mér mail.

En ég setti vefrallýið sem við Anna Magnea sömdum inn á skilasíðuna . Vefrallýið er ætlað nemendum í 5. - 6. bekk og er n.k. lífsleikni eða neytendafræðsla. Nemendur læra að flakka um Netverslun Hagkaupa, finna ýmsan varning og skoða verð. Ég ætla síðan að bæta hinu vefrallýinu við þegar við erum búnar að ganga frá því. Tilgangurinn með því vefrallýi er að kenna nemendum að finna mismunandi netverslanir og nota til þess Leit.is . Þeir eiga að flakka um verslanirnar, finna ýmsar vörur og kanna verð.

2003-02-04T19:42:00.000Z

Nú er ég komin með nettenginguna í lag þ.e. ég get tengt fleiri en eina tölvu við Netið heima hjá mér. Mér tókst að senda Systkinavefinn á vefsvæðið mitt og ætla að tengja í hann frá mínum vef. Þetta er búin að vera ágætis æfing í Dreamweaver en ég er engan veginn sátt við hvað mér gengur illa að átta mig á ýmsum hlutum í forritinu. Ég hef t.d. verið að reyna að eiga við töflurnar en það hefur ekki gengið sem skildi. Sama á við með myndirnar þ.e. að staðsetja þær þar sem ég vil. Held reyndar að það tengist töflumálinu. Þarf að verða mér úti um bók /efni til að læra þetta betur. Ég er svolítið að rugla með Standard view og Layout view og veit aldrei nákvæmlega hvar best er að vera.

2003-02-03T16:38:00.000Z

Fór og kíkti á kennarabloggið hjá Salvöru og leist vel á. Þar er komið nýtt skilaboðakerfi og gaman verður að sjá hvernig það kemur til með að virka.

Annars fór ég í dag og sótti switch og netsnúru og ætla ég að freistast til að nota sömu ADSL tenginguna fyrir fleiri tölvur þ.e. fartölvuna mína og hugsanlega samnemenda sem koma til að vinna með mér. Anna Magnea hefur komið og Anna Día og það er svolítið erfitt að komast ekki í samband.

Ég var búin að lofa henni Arndísi dóttur minni að koma út systkinavefnum "hennar". Vefurinn er í raun samvinnuverkefni. Hún lagði til allan texta og hefur ákveðið hvernig hlutirnir eiga að líta út og ég hef lagt til mína litlu kunnáttu í Dreamwever. Þetta var ágætis verkefni fyrir mig til að koma mér af stað. Ég er hins vegar svolítið hikandi með að senda annan vef á sama vefsvæðið en ég finn út úr því, ég á þá afrit á tölvunni minni ef illa fer. Er ekki bara galdurinn að hafa hvern vef í möppu og þá er í lagi að hafa eina default eða index síðu í hverri möppu??

2003-02-02T23:18:00.000Z

Nú er dagur að kvöldi kominn. Ég er enn miður mín því ég missti af leik Íslendinga í handboltanum í morgun, hreinlega gleymdi að horfa á hann. Þvílíkur bömmer. Mér var nú ráðlagt að játa ekki slíka synd en ég ákvað samt sem áður að létta á samviskunni.

Mér og Dreamweaver hefur ekki samið sem best og ég bíð enn eftir að andinn komi yfir mig. Hér kemur vefurinn minn . Ég vona að mér gefist tækifæri fljótlega til að æfa mig og lesa mér örlítið betur til þannig að hægt sé að bæta afurðina.

2003-02-02T10:20:00.000Z

Góðan daginn!!!

Enn og aftur komin við tölvuna. Nú er að byrja að fikta aðeins í Dreamweaver og sjá hvort okkur semur. Fjölskyldan er farin að spyrja mig hvort ég ætli að taka fartölvuna með á fæðingardeildina. Ég held ég láti það nú ógert!!! Hef hugsað mér að vera svolítið dugleg núna því þá get ég hugsanlega leyft mér að vera örlítið ódugleg fyrst eftir að nýi einstaklingurinn bætist við fjölskylduna. Þetta er alveg skuggalegt hvað maður verður húkt á því að prófa hina ýmsu hluti sem manni hafði ekki órað fyrir að hafa gaman af að eltast við.

2003-02-01T22:15:00.000Z

Enn og aftur eyðir maður tíma í að hanga yfir tæknigrúski. Ég reyndi árangurslaust að tengja fartölvuna mína við Netið á sömu ADSL tengingu og heimilistölvan. Er núna sannfærð um að það virki ekki nema með switch og nýrri netsnúru. Fór á computer.is og pantaði þetta og ætla að sækja eftir helgina. Get þó glaðst yfir að ftp málin eru komin í lag og okkur tókst að senda vefsíðuna hennar Önnu Magneu út á Netið. Nú þarf ég bara að hunskast til að einbeita mér að minni síðu og ljúka við vefrallýið og senda það.

Ætla að setja hérna slóð á html-kóða á netinu þ.e. hvernig hægt er að fá inn í og ð og fleiri stafi sem virðast ekki koma inn áreynslulaust þegar maður er að breyta í íslensku t.d. íslenska í Tag bord eða setja tengla o.fl. Mér var bent á þetta og fleiri geta þá notið. Mjög einfalt mál virðist vera bara að líma inn kóðann i stað stafanna og búmm komið í lag!!! Hér er síðan .

Bestu kveðjur

Elísabet

2003-02-01T16:22:00.000Z

Loksins erum við búnar að gera vefrallý. Anna Magnea kom snemma í morgun og fórum við þá að vinna að því að búa til þessi vefrallý sem tengjast lífsleikni og neytendafræðslu. Annað vefrallýið gengur út á að nemendur læri að nota Leit.is til að leita að ýmsum upplýsingum sem snerta heimilið og daglegt líf. Þar er hægt að velja ýmsa leitarflokka. Hitt vefrallýið gengur út á að kynna sér verslunarmöguleika á netinu. Þá beinum við nemendum á vef Hagkaupa því þar er bæði hægt að versla matvöru og ýmsa sérvöru. Nemendur eiga að skoða ýmsa vöruflokka og versla m.a. matvöru, bók, gjöf o.fl. Þeir fá uppgefna hámarksupphæð sem þeir mega eyða í verkefnið. Nú er bara að demba sér í að vefa þetta og senda á Netið.

2003-02-01T09:44:00.000Z

Jæja núna birtast pistlarnir á réttum! Alveg furðulegt hvernig þetta hrekkur úr og í lag alveg sjálfkrafa. Það er víst best að slappa af í sólahring ef upp koma vandamál og þá hugsanlega hverfa þau!!! Hins vegar er borðinn enn eitthvað skrýtin á ,,Eldri pistlar" síðunni.
Ég prófaði ftp tenginguna í gær og hún var komin í lag þannig að ég vona að það takist að senda verkefnin í dag.

Hér er mjög góð síða fyrir þá sem eru að búa til vefi. Hérna er m.a. hægt að sjá númerin á öllum litunum í Hex kerfinu. Þetta er síðan Webmonkey . Til að sjá litina er valið Color Codes. Ýmislegt annað áhugavert er að finna á þessum vef í tengslum við vefsíðugerð.

2003-01-31T18:15:00.000Z

Ég var að taka eftir því að pistlarnir sem ég skrifa núna birtast ekki á forsíðunni heldur undir eldri pistla. Þetta er skrýtið og eitthvað alveg nýtt!!! Hef engu verið að breyta í template eða neitt. Borðinn er eitthvað skrýtinn líka á eldri pistla síðunni. Þarf að skoða þetta líka um helgina. Nenni því ekki alveg strax.

2003-01-31T18:03:00.000Z

Ég hamaðist í gær við að reyna að ná Ftp sambandi við vefsvæðið mitt en ekkert gekk. Var orðin sannfærð um að ég væri auli sem hefði misskilið eitthvað hrapalega það sem fram fór í Kennó á sínum tíma. Neitaði þó að gefast upp og gerði ótal tilraunir og leikfimiæfingar. Að lokum gafst ég upp beygð en samt ekki brotin og ákvað að fara í dag og ræða við mér færari aðila. Hafði samband við vefstjóra og kom þá í ljós að ftp aðgangur var ekki í lagi hjá neinum notanda og létti nú sumum við það. Þessu var vonandi kippt í liðinn. Ætla að reyna aftur núna í kvöld og sjá hvort ég næ sambandi. Fékk uppgefna IP tölvu sem ég á að nota. Krosslegg fingur og vona það besta. Annars verður bara að bíta í það súra og reyna aftur eftir helgina. Kemst þótt hægt fari!!!!

Gaman að sjá hvað margir eru duglegir og færir. Renndi yfir bloggið hjá nokkrum og sá þessar flottu vefsíður og nýja fína möguleika t.d. hjá henni
Ingigerði í blogginu þ.e. spjallið. Kannski maður eigi eftir að hætta sér síðar út í það. Það er mjög gagnlegt og gaman að kíkja hjá öðrum og læra. Flott hjá þér Ingigerður og stöllur!! Hef líka kíkt hjá honum Árna og stal m.a. hugmyndinni um teljarann þaðan. Takk fyrir það Árni!

Núna er þó ofarlega í huga mér að komast á Netið úr fartölvunni líka í gegnum ADSL tenginguna á heimilinu. Mér er tjáð að það eigi ekki að vera neitt mál, þurfi bara netsnúru, netkort í fartölvuna og búið. Hugsanlega þarf ég hub en tæknimaðurinn hjá Íslandssíma hélt þó ekki. Reyndi það í gær en virkaði ekki. Þarf að eyða meiri tíma í að finna út úr því. Einkum þó þar sem ég er farin að slást um tölvuna við dótturina sem skyndilega hefur sýnt aukinn áhuga á tölvutækninni.

2003-01-31T17:45:00.000Z

Ég er búin að vera á þeytingi síðan klukkan 8:00 í morgun. Ákvað að nota daginn í að útrétta smá og varð því lítið úr tölvugrúski fyrr en núna seinni partinn. Anna Magnea rak þá inn trýnið og við vorum sammála um að brotlenda hugmyndinni um vefrallý tengt börnum/unglingum og kynþroska. Fundum lítið bitastætt efni. Ef eitthvað fannst þá var það að finna á ,,vafasömum" slóðum sem beindu sjónum að kynlífi, kynlífsvandamálum, hjálpartækjum og þess háttar. Kannski ekki alveg tímabært fyrir nemendur í 6. bekk. Eða hvað???? Það er kannski aldrei of fljótt af stað farið.

Ný hugmynd fæðist

Næsta hugmynd er vefrallý sem tengist lífsleikni eða nýtist í tengslum við þá fræðslu. Höfum hugsað okkur að styðjast við Leit.is og láta nemendur skoða verslunarmöguleika á Netinu o.fl. Hugmyndin er síðan að gera hugsanlega nokkur vefrallý sem þjálfa nemendur í að finna gagnlegar upplýsingar / miðla á Netinu sem snerta daglegt líf s.s. verslun, símaskrá, þjóðskrá, vinnumiðlanir, vefir sveitafélaga (rafræn stjórnsýsla) og fl.

Ætlum að vinda okkur í að ljúka þessu strax í fyrramálið.

2003-01-30T12:28:00.000Z

Ég var að setja Salvöru á ,,contact listann" minn í MSN. Mér finnst mjög gott að nota MSN til samskipta og við notum þetta nokkur í vinnunni. Ég tala nú ekki um þegar maður er komin heim í barneignarleyfi og dettur svolítið út úr samskiptum við annað fullorðið fólk. Ég hef prófað s.k. ,,Voice conversation" en þá getur maður talað beint í rauntíma við fólk. Til þess að þetta sé mögulegt þarf að nota headphone með hljóðnema. Við höfum getað rætt svona saman vinnufélagarnir (þá nota ég fartölvuna mína og er innan Garðabæjar þ.e. allar tölvur á domain þar) en ég virðist ekki náð ,,talsambandi" úr tölvunni heima hvorki við Garðabæ, mömmu í Vestmannaeyjum eða Báru Mjöll á Seyðisfirði. við reyndum nú ítrekað við Bára að spjalla saman s.l. önn hjá henni Sólveigu en ekkert gekk!!
Kann einhver að leysa slík vandamál. Ætli það sé hljóðkortið sem ég er með eða???? Ég er búin að prófa að setja MSN upp aftur, skipta út headphone og hljóðnema og ganga úr skugga um að það virki en ég næ aldrei sambandi. Hins vegar gengur fínt að skrifast á. Vel þegið ef einhver hefur ábendingar, ráð eða leiðbeiningar.

2003-01-30T11:53:00.000Z

Tæknisaga
Ég ætla að rekja hér tæknisögu mína. Textinn varð nú heldur langur en ég reyndi að kaflaskipta honum þannig að hægt er að velja og hafna á skjótan hátt.
Tæknisaga mín er að miklum hluta samofinn tæknisögu skólans sem ég starfa við í dag Hofsstaðaskóla í Garðabæ. Þörfin og áhugi á að nýta tölvur til gagns og ánægju vaknaði í tengslum við starf mitt sem kennari við skólann.

Skólaárin í Vestmannaeyjum
Ég lærði lítið sem ekkert á tölvur í barnaskóla, í það minnsta þá man ég mjög lítið eftir því þannig að það hefur ekki vakið áhuga minn. Ég man fyrst eftir að hafa lært á tölvu í Framhaldsskólanum í Vestmannaeyjum á árunum 1988-1990. Sú kennsla fór fram á einni önn og það sem er minnisstæðast frá þeim tíma er að kennarinn var svo oft veikur að tímarnir féllu oftar en ekki niður. Það þótti mér ekkert sérstaklega súrt held ég. Ég var sem sagt ekkert tæknifrík eða sýndi þessum heimi mikinn áhuga á þessum tíma. Ég man að á æskuheimilinu var til gömul Machintosh tölva sem mamma var eitthvað að hamast á. Seinna fór ég að líta örlítið hýru auga til þessa grips. Mamma og pabbi voru og eru hins vegar áhugamenn um alls kyns heimilistæki og tól og vorum við oftast með þeim fyrri til að fjárfesta í slíkum búnaði. Milli foreldra minna ríkir alger verkaskipting hvað varðar tæki og tól. Pabbi snertir aldrei tölvu og kann ekkert á þær en mamma er mikill áhugamaður um tölvur og á góðar ,,græjur”. Pabbi kann hins vegar sérfræðingur á stafræna vídeóvél, myndavél og annað slíkt sem hann hefur áhuga á.

Nám við kennaraháskóla Íslands 1992-1995
Þegar ég hóf nám við Kennaraháskólann 1992 erfði ég gamla Machintosh tölvu frá mömmu og byrjaði að notast við hana. Ég notaði Machintosh tölvurnar mikið sem stóðu nemendum til boða í tölvustofu KHÍ á þessum tíma. Lokaritgerðina mína vann ég á slíka tölvu. Ég man hins vegar mjög glöggt eftir því að daginn áður en við áttum að skila lokaritgerðinni var öllum Machintosh tölvunum hent út og nýjar settar í staðinn. Sjokkið var gríðarlegt því afritunarmálin voru meira og minna í molum, brot úr ritgerðinni voru á disklingum hér og þar og hluti enn á harða diskinum í einni af tölvunum. Kunnáttan var fremur lítil og nokkur vinna fór í að leita að efninu og líma það saman á ný. En það tókst!! Nýju Machintosh tölvurnar sem komu voru fremur flóknar og líkari PC-tölvum. Ég tók fljótt þá ákvörðun eftir þessi umskipti að snúa mér að PC-tölvunni. Áhugi minn á tölvum og tækniveseni hófst þó ekki fyrir alvöru fyrr en ég byrjaði að kenna við Hofsstaðaskóla árið 1996.

Starf mitt sem grunnskólakennari
Ég var umsjónarkennari í 5. bekk. Á þessum tíma voru mjög fáar tölvur í skólanum og þær voru lítið notaðar af kennurum. Til stóð að breyta námsmati í skólanum og þar með vitnisburðarblöðum nemenda. Ég vildi nota tölvuna til að létta mér vinnuna í sambandi við námsmatið og til að komast hjá því að handskrifa 25 vitnisburðarblöð. Ég hef hingað til ekki verið þekkt fyrir áferðafallega rithönd. Skólastjórinn Hilmar Ingólfsson tók vel í málið og saman réðumst við í að breyta vitnisburðarblöðunum og innleiða nýjar vinnuaðferðir. Á mér hvíldi að ,,hanna” nýtt útlit og styðja kennara varðandi vinnubrögð. Þarna hófst tölvugrúskið fyrir alvöru með fyrsta raunverulega verkefninu. Ég fjárfesti í nýrri PC- tölvu og lagðist í að læra almennilega á hana. Ég notaði einkum tvö forrit Excel til að setja upp ,,vinnubækur” fyrir kennara þar sem hægt væri að slá inn einkunnir úr könnunum, verkefnum og prófum í hinum ýmsu greinum og láta forritið reikna út lokaeinkunn nemenda, sýna meðaltal, hæsta og lægsta gildi og seilingu. Ég notaði ritvinnsluforritið Word til að búa til vitnisburðarblöðin. Það voru ekki ófáar stundirnar sem fóru í að glíma við útlitshönnun og uppsetningu á töflum. Samkennarar mínir tóku nú misvel í þetta brölt í byrjun en þegar þeir sáu tímasparnaðinn t.d. með því að nota ,,vinnubækurnar” í Excel til útreikninga tóku nokkrir við sér. Ég læsti öllum formúlureitum eftir að upp komu smávægilegir örðugleikar og nokkrir nemendur fengu 11 hjá einhverjum kennurum í einkunn!! Nú lá leiðin aðeins upp á við. Vinnubrögðin hafa breyst ansi mikið í skólanum frá þessum tíma. Nú notum við forritið Stundvísi til að halda utan um námsferil nemenda og allar einkunnir geymast í gagnagrunni. Við kjósum þó enn í dag að notast við ,,gömlu” vitnisburðarblöðin í endurbættri útgáfu. Einkunnirnar flytjum við síðan úr Stundvísi með Mail Merge skipun í Word skjölin.
Upp frá þessu brölti með vitnisburðarmálin glæddist áhugi minn á tölvum og tækni til muna og ekki var aftur snúið. Ég kenndi á tölvur og Ritþjálfa á bókasafni skólans og var fagstjóri í tölvum. Tölvueign skólans jókst jafnt og þétt á þessum tíma svo og áhugi og notkun á tölvum og jaðartækjum.
Í nóvember 1998 var stigið stórt skref í tækjavæðingu skólans því þá var tekin í notkun ný og glæsileg tölvustofa með 16 margmiðlunartölvum, skjávarpa, prentara og myndlesara. Skólinn stóð sig alveg ágætlega í tölvu- og upplýsingatækni á þessum tíma þegar miðað er við aðra skóla. En þegar tekið var mið af útkomu nýrrar aðalnámskrár grunnskóla 1999 var ýmislegt sem við vildum þróa betur og marka skýra stefnu um.

Útkoma nýrrar aðalnámskrár grunnskóla 1999
Bæjarráð Garðabæjar skipaði starfshóp til að gera úttekt á tölvumálum grunnskóla bæjarins og móta tillögur um framtíðarskipan tölvumála m.t.t. aðalnámskrár grunnskóla. Starfshópurinn hélt alls 8 fundi og skilaði af sér skýrslu. Megináherslur í tillögum starfshópsins voru þær að leggja skildi áherslu á kennarana þ.e. starfsumhverfi þeirra og endurmenntun í upplýsingatækni. Það sem nefndin lagði m.a. til var að kennarar fengju fartölvur til umráða ásamt öllum þeim hugbúnaði sem þeir þyrftu að nota í tengslum við starf sitt. Einnig var lagt til að ráðið yrði í tvö 100% stöðugildi sérstaka starfsmenn til að fylgja tölvuvæðingunni eftir og styðja kennara.
Óhætt er að segja að starfsumhverfi kennara hefur breyst mikið síðan þeir fengu fartölvurnar haustið 2000. Kröfurnar hafa einnig aukist til þeirra t.d. í tengslum við samskipti innan skóla svo og samskipti milli heimilis og skóla. Haldin hafa verið fjölmörg námskeið í skólanum og miklar framfarir hafa átt sér stað. Í dag eru allir umsjónarkennarar skólans ,,tölvukennarar” og mæta með nemendum sínum í tölvustofu og eiga þess kost að nota fartölvur með nemendum í almennri kennslu.

Starf mitt sem kennsluráðgjafi í tölvu- og upplýsingatækni
Starf mitt felst að miklu leyti í að vera til staðar á vettvangi og aðstoða kennara við tölvunotkun. Kennsluráðgjafi hefur einnig umsjón með kennsluáætlanagerð og sér um að leiðbeina kennurum varðandi samþættingu tölvunotkunar í tengslum við almennt nám . Einnig hefur mikil vinna farið í að leggja mat á kunnáttu kennara á tölvur og í kjölfarið koma á óformlegri og formlegri endurmenntun. Starf kennsluráðgjafa er í raun mjög víðfermt og kemur inn á fjölmörg svið skólastarfsins s.s. kennslu, nám og stjórnun. Starfið lýtur nánast að öllu því sem á einhvern hátt felur í sér notkun tölvu- og upplýsingatækni.

Sá lærir sem lifir!
Ég hef tekið ýmis styttri tölvunámskeið og sótti námskeið hjá Allison McDonald í kennsluráðgjöf á síðasta ári. Auk þess sat ég í stýrihópi skólans í skólaþróunarverkefninu Aukin gæði náms. Haustið 2002 hóf ég nám við framhaldsdeild Kennaraháskóla Íslands og var þá á námskeiðinu Upplýsingatækni í menntun og tölvumenning skóla hjá Dr. Sólveigu Jakobsdóttur. Auk þess var ég í FrontPage vefhönnunarnámi hjá Tölvu- og verkfræðiþjónustunni. Núna er ég á námskeiðinu Nám og kennsla á Netinu og Salvöru Gissurardóttur og hlakka mikið til að takast á því ný verkefni sem bíða þar. Óhætt er að segja að námskeiðsbyrjunin lofar góðu um framhaldið.

Tækjaeign heimilisins
Fyrsta tölvan sem við fjárfestum í var 75Mhz PC tölva. Hana keyptum við eftir að ég byrjaði að kenna í Hofsstaðaskóla í kringum 1997. Hún dvaldi þó ekki lengi í okkar eigu því hún var úreld að okkar mati áður en hún fór úr ábyrgð þ.e. 8 mánaða gömul. Þá keyptum við nýja öfluga PC- tölvu sem hlaut ótal andlitslyftingar.
Ég held að við séum í meðallagi tækjavædd. Við erum 3 í heimili, við hjónaleysin ásamt 11 ára dóttur. Á heimilinu eru í dag tvær tölvur þ.e. fartölva sem ég er með og heimilistölvan. Heimilistölvan er nokkuð öflug PC-vél um 1,4Ghz, 256 í vinnsluminni, 40GB hörðum diski, 50X geisladrifi og skrifara. Við erum með ADSL tengingu við netið. Við erum með myndlesara tengdan við tölvuna, hátalara og eigum stafræna myndavél sem er mikið notuð. Dóttir okkar á PlayStation leikjatölvu og örfáa leiki. Sú tölva er ekki mikið notuð. Hún á einnig dansteppi sem hún getur tengt við sjónvarp.
Við erum með tvo þráðlausa síma auk þriggja borðsíma. Allir eru með eigin GSM síma, en dóttirin hefur lítinn áhuga á að nota sinn og er sjaldnast með hann. Við erum með 2 sjónvörp og 2 myndbandstæki auk helstu heimilistækja til að létta okkur störfin s.s. örbylgjuofn, uppvöskunarvél, þvottavél, þurrkara og bílskúrshurðaopnara.

Tölvunotkun
Hvað tölvunotkun mína varðar þá nota ég mest Microsoft Office hugbúnaðinn: Word, Excel, Powerpoint, Outlook, Publisher og FrontPage. Auk þess hef ég notað Adobe Photshop í myndvinnslu, Internet Explorer til að vafra um Netið, Stundvísi o.fl. Ég nota MSN til samskipta t.d. við samstarfsfélaga og mömmu sem býr í Vestmannaeyjum. Við notum Netið svolítið bæði til afþreyingar og til að afla okkur upplýsinga s.s. símaskrá, þjóðskrá og ýmsar fleiri upplýsingalindir. Þetta breytist mikið með tilkomu sítengingar.
Ég er með öfluga og góða IBM fartölvu með þráðlausu netkorti, DVD drifi og skrifara. Ég kýs þó enn að nota heimilistölvuna þegar ég er heima því hún er með stórum skjá og þægilegri að vinna á í lengri tíma.

Dóttirin Arndís Erna hefur ekki sýnt tækninni neinn sérstakan áhuga hingað til en sá áhugi er sífellt að aukast. Ég bað hana að skrifa nokkrar línur um tækjamálin sjálfa og leyfi hennar sýn að fylgja með hér:

Tæknisagan mín

Ég heiti Arndís Erna og ég er ellefu ára. Hér ætla ég að skrifa stutta tæknisögu. Á heimilinu mínu eru til alskyns tæki t.d örbylgjuofn, uppþvottavél, þvottavél, þurrkari, PlayStation tölva, útvarp, PC tölva og margt fleira. Ég kann á öll þessi tæki og nota þau oft en sum tækin langar mig að kunna meira á t.d PC tölvu. Ég kann að fara á netið og fara í leiki, skrifa ritgerð og margt fleira en mig langar að kunna meira t.d búa til vefsíðu. Ég læri á tölvur í skólanum en mér finnst ég ekki kunna eða læra nóg á þær. Ég get ímyndað mér að tölvur verði mikið meira notaðar í framtíðinni og væri kannski hægt að gera allt í gegnum netið, kannski verða símarnir svo litlir að það væri hægt að geyma þá í eyranu og hafa lítið tæki í munninum til að tala í, kannski væri hægt að taka hreyfimyndir á myndavélina eins og í Harry Potter, kannski mætti maður ráða hvað maður horfir á í sjónvarpinu og velja bara uppáhaldsþættina sína, heimilistækin verða kannski allt öðruvísi en núna t.d væri hægt að fá vélmenni eða tæki til að gera allt fyrir sig og maður þyrfti ekki að gera neitt sjálfur það er svo margt sem getur gerst í framtíðinni”
(Arndís Erna 11 ára).

Framtíðarsýn

Ég held að ég verði að vera sammála lokaorðum dóttur minnar Arndísar Ernu ,,...það er svo margt sem getur gerst í framtíðinni”. Hver hefði spáð svo örum breytingum bæði hvað varðar vél- og hugbúnað eins og raun ber vitni. Alltaf er verið að spá að nú fari þróunin að hægjast en ég sé í raun engin merki um slíkt. Ég held hins vegar, og vona, að meiri áhersla verði lögð á notagildi nýrrar tækni og innleiðingu almennrar tækniþekkingar þ.e. að allir fái hlutdeild og aðgang. Hingað til hefur tölvunotkun að allnokkru leyti einkennst af afþreyingu þá kannski sérstaklega hjá yngri kynslóðinni. Skólarnir hafa fetað þá slóð þ.e. að nota tölvurnar sem afþreyingu og n.k. gulrót fremur en öflugan miðil til náms og kennslu. En ég er bjartsýn og tel að tölvan hafi gjörbylt starfsháttum kennara og nemenda og komi til með að breyta þeim enn meira í framtíðinni. Það gerist þó eingöngu með vel skipulagðri endurmenntun kennara og stuðning við þá í því að innleiða nýja tækni og nýjar kennsluaðferðir. Samskipti heimila og skóla hafa þróast og breyst á s.l. árum og upplýsingagjöf til heimila stóraukist. Í framtíðinni sé ég Netið muni enn auka aðgang fólks að menntun og almennum upplýsingum.

Framboð af námsefni og upplýsingum hefur aukist gífurlega með tilkomu Netsins. Í dag hafa kennara mun meira úr að moða varðandi námsefni. Ýmsir vefir s.s. Skólavefurinn, Stærðfræði og tölvulæsisvefurinn, BarnUng, Vísindavefurinn og fjölmargir námsvefir Námsgagnastofnunar o.fl. gera kennurum kleift að velja úr og hafna. Væntanleg Menntagátt mun enn auka á þetta framboð. Í framtíðinni sé ég það sem eitt af stóru verkefnunum að fá kennara til að þróa með sér kennsluhætti, ,,þora” að leggja kennslubókinni og bls. 2 og gera það að vana að þjálfa nemendur í að nýta efni af Neti og hugsanlega gagnvirkar æfingar, samskipti, upplýsingaleit o.fl. Þjálfa þarf nemendur og kennara í að flokka efni og velja úr þeirra ofgnótt upplýsinga sem hægt er að nálgast. Í dag eru kennarar enn svolítið bundnir kennslubókunum en annað er notað sem uppfyllingar- og/eða ítarefni.

Ég held að tölvurnar og tæknin eigi eftir að breyta jafn miklu í framtíðinni og þær hafa gert hingað til. Þessar breytingar eiga eftir að setja mark sitt á allar starfsgreinar og þjóðlífið sjálft. Fólk mun að stórum hluta sækja sér upplýsingar og þjónustu í gengum tölvur. Sjálfsagt verður að nálgast upplýsingar og umsóknareyðublöð frá sveitafélögum á Netinu, rafræn stjórnsýsla mun aukast sbr. bankaviðskipti, skattaskýrslur o.fl. Svo er spurning hvort verslun og markaðssetning eigi eftir að ná einhverju flugi á Netinu.
Samskiptamálin og flutningsgeta um Netið á enn eftir að aukast og fólk á í mun meira mæli eftir að nýta sér það við leik og störf. Heimurinn verður einn stór leikvöllur!!!

Ég treysti mér lítið að spá fyrir um öll þau nýju tæki og tól sem koma til með að líta dagsins ljós, læt aðra um það. Tel það ekki vera mikilvægasta hlutinn heldur hvernig við komum til með að vinna úr öllum þeim nýjungum sem á okkur dynja.

Að lokum held ég þó að hafa verði í huga að tölvan og tæknin eru verkfæri. Þessi verkfæri koma aldrei í stað mannlegra samskipta og sköpunargleði og þeirri orku sem skapast þegar einstaklingar hittast, deila framtíðardraumum og taka höndum saman við ný verkefni. Því má ekki gleyma í menntun framtíðar að það er mannshugurinn sem skiptir máli og hvernig fólk lærir að læra og bjarga sér í því samfélagi sem það er hluti af.

Hugleiðingar settar á blað þann 29. janúar 2003 á námskeiðinu
Nám og Kennsla á Netinu í umsjón Salvarar Gissurardóttur

2003-01-30T11:20:00.000Z

Ég hef verið að bralla ýmislegt síðan ég skrifaði síðast í dagbókina. Ég er búin að ljúka við tæknisöguna og ætla að demba henni út núna á eftir. Dóttirin sem er 11 ára hefur hingað til ekki sýnt tölvum neinn sérstakan áhuga þó hún sé nú aðeins byrjuð að fikta. Hún er búin að vera að fylgjast með mér í tölvunni síðustu daga það hefur kveikt áhuga hennar á tölvuheiminum. Hún vildi endilega fá að skrifa eitthvað inn í tölvuna og hefur síðustu daga ekki látið mig í friði því hún vill endilega skrifa eitthvað fyrir mig inn í tölvuna. Hún vildi líka læra að gera vefsíðu. Mér datt í hug að láta hana skrifa stutta tæknisögu og læt hana fljóta með minni sögu.

Við réðumst síðan í að gera lítinn vef í Dreamveawer, þrátt fyrir litla kunnáttu á forritið. Þennan vef köllum við Systkinavefinn. Arndís skrifar allan textann sjálf og hefur mjög ákveðnar skoðanir á því hvaða myndir eigi að velja og hvernig hlutirnir eiga að líta út. Þetta hefur verið ágæt lexía fyrir mig þ.e. að fá tíma til að sitja löngum stundum með 11 ára barni og horfa á veröldina með þeirra augum. Arndís bíður nú spennt eftir litla systkini sýnu og það er gott að hafa eitthvað til að dreifa huganum.

2003-01-27T17:13:00.000Z

Ég sat svolítið við tölvuna í gær og í dag. Anna Magnea sem Kennir í Hofsstaðaskóla og er á námskeiðinu með mér kom til mín og við vorum eitthvað að bera bækur okkar saman. Við fórum m.a. aðeins yfir dagbókarmálin. Hérna er dagbókin hennar Önnu Magneu .

Við réðumst síðan á Dreamweaver en okkur féllust fljótt hendur. Mikið er nú erfitt að koma sér af stað í nýju forriti. Allt sem við höfðum lært í innilotunni er einhversstaðar djúpt grafið. En þetta kemur, mér skal takast að ráða fram úr þessu. Mér hefur samið ágætlega við Frontpage og er nýbúin að ná sæmilegum tökum á því. En svona er nú lífið eilífar skemmtilegar nýjungar, ný verkefni að kljást við. Ég er einhvern veginn ekki andlega tilbúin að hella mér í drauminn af fullum krafti strax því mínir draumar snúast um annað þessa dagana.

Við Anna Magnea eyddum þó svolitlum tíma í að skoða tilbúin vefsíðusnið fyrir Drauminn á Netinu en það er spurning hvort maður hafi það til hliðsjónar en reyni að klambra einhverju saman sjálfur. Þá getur maður aðeins rifjað upp myndvinnslukunnáttuna t.d. til að gera borða eða eitthvað slíkt. Ég hugsa að ég semji nú við Photshop til að byrja með en skoði svo Fireworks í rólegheitum. Hér á við hugtakið hennar Sólveigar "kemst þó hægt fari". Ég er nú engin snillingur í grafík eða útlistmótun en maður verður að reyna að nýta sér það sem maður hefur þó lært. Við fundum alveg ágæta síðu með ókeypis bakgrunnum og gott að geta gripið í hana þegar og ef á þarf að halda.

En ætli ég einbeiti mér ekki að því að klambra saman tæknisögunni minni á næstu dögum og fá hugmynd í tengslum við vefrallý. Ég hafði hugsað mér að reyna að finna efni í tengslum við stráka og stelpur þ.e. kynfræðslu/þroskaárin. Anna Magnea var að hugsa um að gera rallý á móti mér þ.e. önnur um stráka og hin um stelpur. Þetta væri síðan hægt að nota í tengslum við kynfræðsluna í 6. bekk í skólanum. En sjáum til hvort við finnum eitthvað á Netinu.

2003-01-25T00:40:00.000Z

Hér kemur stutt kynning á mér!!!!

Ég er

Ég fæddist í Vestmannaeyjum þann 16. apríl 1971. Þar bjó ég þangað til ég var tvítug. Ég gekk í Barnaskóla Vestmannaeyja og síðar í Framhaldsskólann í Vestmannaeyjum, þar lauk ég stúdentsprófi af Náttúrufræðibraut um jólin 1990. Ég flutti til Hafnarfjarðar í júní 1991 og bý þar ásamt sambýlismanni mínum Birni Sverrissyni.

Við eigum eina dóttur. Hún heitir Arndís Erna og er 11 ára. Hún er einkadóttir okkar en ekki mikið lengur því við eigum von á barni nú í byrjun febrúar.
Ég hóf nám við Kennaraháskóla Íslands 1992 og útskrifaðist, með íslensku og líffræði sem valgreinar árið 1995. Ég fór að vinna á leikskóla eftir útskrift en hélt síðan í ævintýraferð til Taílands. Eftir Taílandsferðina n.t.t. í janúar 1996 byrjaði ég að kenna við Hofsstaðaskóla í Garðabæ.

Ég kenndi fyrst til að byrja með ýmsar greinar í mörgum bekkjum en tók svo að mér umsjón með bekk. Ég hef verið umsjónarkennari í 5. og 6. bekk. Samhliða því kenndi ég á tölvur og Ritþjálfa á bókasafni skólans. Fljótlega tók ég að mér fagstjórn í tölvum og sneri mér síðan alfarið að tölvukennslu. Hofsstaðaskóli hefur að skipa mörgum góðum kennurum og almennur áhugi hefur verið á uppbyggingu í tölvu- og upplýsingatækni í Garðabæ.

Haustið 2000 samþykkti bæjarráð Garðabæjar að allir kennarar í Garðabæ fengju fartölvur. Jafnframt var samþykkt að ráða tölvuumsjónarmenn og kennsluráðgjafa í tölvu- og upplýsingatækni í fullar stöður við grunnskóla bæjarins.

Ég hef gegnt starfi kennslurágjafa í tölvu- og upplýsingatækni við Hofsstaðaskóla síðan haustið 2000. Er nú komin í barneignarfrí til 1. nóvember 2003.

Helsta áhugamál mín eru: Fjölskyldan, vinirnir, Tölvur, bækur, kvikmyndir og ferðalög.

2003-01-24T23:39:00.000Z

Best að hætta að eiga við útlitið á þessu í bili. Ég er í það minnsta búin að koma myndinni af mér á réttan stað og gekk það bara vel. Ég setti líka inn krækju ef einhverjum dytti í hug að senda mér póst. Kannski set ég síðar inn krækjur á einhverja aðra bloggera (samnemendur).

2003-01-24T22:30:00.000Z

Ég var að átta mig á því að þegar ég breyti templatinu þ.e. Html - kóðanum þá virðist hún ekki koma fram fyrr en við næstu sendingu þ.e. Post & publish. Ætla í það minnsta að prófa og sjá hvað gerist nú.

2003-01-24T22:20:00.000Z

Ég er nú lítið búin að kíkja á bloggið síðan í gær. Ætla að fara að vinna í því að skrifa smá kynningu á mér og setja mynd. Síðan er ég að reyna að rifja upp þetta litla Html sem ég kann til að gera smávægilegar breytingar en það virðist ganga ansi hægt fyrir sig. Var að skoða bloggið hans Árna og sýnist hann standa sig ansi vel í Html- málinu. Komin þessi fína mynd og fleira gott. Þeir geta þetta þessir Hafnfirðingar. Það tekur smá tíma og mikla þolinmæði að átta sig á hvernig hægt er að staðsetja hlutina rétt og fá þetta til að virka.

2003-01-23T13:50:00.000Z

Ég er að hamast við að reyna að ná stjórn á því hvar myndir lenda á síðunum þegar maður setur þær svona inn í bloggið. Ég er búin að kynna mér örlítið html en telst seint sérfræðingur í því. Til allrar lukku er ég nú með kennslubók frá Tölvu og verkfræðiþjónustunni þar sem hægt er að fletta upp lista yfir html-tög. En nú er bara að vera kaldur og gera tilraunir. En guð minn góður hvað þetta tekur langan tíma. Ætti maður kannski að einbeita sér að verkefnunum í staðinn fyrir að leika sér í þessu. Þetta er jú allt nám. Þetta er mjög spennandi og ég hlakka mjög til að takast á við námið. Vona að ég nái að vera svolítið í tengslum við "bekkjarfélagana því þannig lærir maður jú mest. Maður verður að vera duglegur að lesa bloggið þeirra í von um að það komi eitthvað að viti fram þar. Kannski kemur eitthvað að viti fram hérna hjá mér síðar. En mér tókst að setja inn krækju með html þannig að þetta rifjast upp hægt og rólega.

2003-01-23T13:24:00.000Z

Nú er þetta blogg farið að virka almennilega sýnist mér. Ef ég hef valið nýtt template eða gert einhverjar útlitsbreytingar hefur það tekið svolítinn tíma að virka, allt upp undir sólahring. Stundum hef ég reynt aftur og þá hefur það virkað hraðar. Ég eyddi gærdeginum í að skanna bréfin sem Salvör sendi og gera mér grein fyrir verkefnunum sem liggja fyrir. Ég ætlaði síðan að hella mér út í að kynna mér þetta blogg betur en guggnaði á því og fór að ryksuga og taka til. Skellti mér síðan á bíó með fjölskylduna, eitthvað sem ég geri nú sjaldan í miðri viku. Að auki fór ég á mynd sem ég hafði nú tilkynnt að ég ætlaði ekki á og skemmti mér vel. Þetta er myndin með rapparanum Eminem (vona að þetta sér rétt skrifað hjá mér, annars fell ég nú í áliti hjá ungdómnum).
Myndin var mjög góð og ég get ekki annað sagt en að ég hafi fílað músíkina í ræmur. Það er mjög mikil lýrík í þessu og sambýlismaðurinn hafði nú orð á því að þetta væri eins og í gamla daga þegar menn voru að kveðast á. Hins vegar voru þeir í myndinni að kveða hver annan í kútinn á mjög svo frumlegan hátt. Mér fannst Eminem komast mjög vel frá þessari mynd. Hann lék vel og er bara nokkuð sætur líka strákurinn!!!

2003-01-22T14:38:00.000Z

Nú er ég búin að kaupa mér auglýsingalaust svæði fyrir bloggið, var raunar búin að gera það áður en við fengum þennan góða haug af pósti frá Salvöru. Ég fjárfesti í Blog*Spot plus 25 og vona að það dugi. Annars var ég nú aðeins að lesa yfir þetta á netinu og það er ýmislegt í boði. Það verður hins vegar að bíða betri tíma. Nú er að fara að vinna sig niður úr verkefnunum sem liggja fyrir. Það er gott að fá þetta svona skýrt og skilmerkilega frá henni Salvöru beint í æð, nánast hægt að nota þetta sem tékklista.
Vei, vei, ég er þá búin með fyrsta lið á listanum þ.e. að taka í notkun eigin vefdagbók. Ég hef nú ekki skráð mikið þar en er að þreifa mig áfram. Sýnist að ég eigi nú að ráða við þetta. Næsta skref er að prófa að setja inn tengla í annað efni og myndir.

2003-01-16T21:40:00.000Z

Er búin að uppfæra bloggsvæðið mitt eins og Salvör mælti með til að losna við auglýsingarnar. Ætla síðan í rólegheitum að kynna mér hvaða önnur fríðindi uppfærslan felur í sér. Setti í Favorties hjá mér slóðina að leiðbeiningunum http://www.blogspot.com/gettingstarted.pyra. Annars held ég að þetta geti nú ekki verið flókið.